الوسم: Zehor

واش راكم مع رمضان؟ إن شاء الله ربي يتقبل منا طاعاتنا وعباداتنا

وصفـــــة اليــــوم

صبيعات الكنافة وصفة توالم رمضان بزاف

في الوصفة نقسم عملنا لاربع خطوات:

تحضير الكنافة
عقدة اللوز
الكريمة للتزيين
القطر

نحتاج لكنافة كاين الي يقلها (القطايف)
سمن او(زبدة)

نجيب لكنافة ديالي
نحاول باش نفتحها ونفكها من بعضاها غير بلعقل باش ما تتفتتش

ندوب سمن او زبدة الي موجود انا نفضل السمن

نفرغ السمن على الكنافة غير بلعقل باش نشوف قداش تحتاج
ونحاول ما نكتروش غير باش تسهل علينا الخدمة واللف بارك
ونحاول باش ديما نحافظ عليها طويلة

وفي هاد الوقت نحضر العقدة
تقدري تديري وش تحبي مي يلزم تكون عقدة الي تتحمل الطياب باش ما تيبسش
تقدري تديري مكسرات صحيحة يعني حبات لوز لو بندق
ممكن تستعملي القشطة

انا استعملت
لوز مطحون خشين
مغرف كبيرة بارك سكر
مغرف صغيرة ماء زهر مش بزاف
يلزم ما تكوونش عجينة

ممبعد نتبع الخطوات

عملت عدة اشكال

كاين الي حطيت فيهم الحشوة وكاين الي خليتهم فارغين (للكريمة)
من الأحسن فالاعشاش هادوك تطيبيهم بلا حشوة كيما يطيبو باش ديريها باش ما تنشفتش الحشوة

نسقيهم بالسمن من فوق وندخلهم الفور

من الاحسن ما تخليهم بزاف فالفور يكون على درجة عالية غير يتحمرو خرجيهم
========
الكريمة:
كوب أو أقل حليب بارد مليح
100غ كرام شانتي
3مغارف كبار سكر قلاصي

ديما نعبرو 2 كيلات سكر بكيلة ماء
=====
وطريقة التزيين كيما تحبي

الاعشاش حشيتهم بالكريمة جاو فوووووووووووووور ذوق رائع

نتمتى تكون عجبتكم وصفة اليوم
إلى الملتقى ان شاء الله عزوحل

سلامي لكن
ادعولي حبيباتي

وصفة اليوم رح تكون

كفتة بالبطاطا والدجاج

وصفة رائعة درتها في رمضان فحبيت نشارككم بيهاااا

اولا نحتاج
صدر دجاج الكيمة على حساب ما تحبي
2 حبات بطاطا مغلية
معدنوس
توم
زيتون اخضر ماشي بزاف
ملح فلفل ابيض و بابريكا(فلفل احمر حلو)
نحط كل المكونات مع بعض من غير البطاطا

البطاطا نهرسهاا وحدها مع شويا بارك كرام فراش ولا حليب (باش تجي خفيفة) ماشي بزاف وملح وفلفل ابيض

بعدما نرحي الدجاج نضيفو على البطاطا المهروسة

ديريها ع الشكل الي تحبيه صبيعات ولا خبيزات انا درتهااا ع شكل كفتة
ممبعد دخليهاا للفريجيدار حتى تحكم روحهااا وممبعد نرمدوهاا فالبيض ولاشابلوغ ماحبيتش ندير الفرينة تاني خفت تجي تقيلة

بالنسبة للبقسماط ولا معروفة بلاشابلوغ الي هي الخبز مرحي انا عندي واجد من ماجي دوقو روووعة مي تقدرو تخدموه فالدار نورمال
يبسي خبز تحطيه فالفور باش يتحمص مليح ممبعدا ترحيه
ادي منو كمية حطي فيها التوابل الي تحبيها
لهاد الوصفة حطي مليح وفلفل و باربيكا حلوة ولا حارة حسب الدوق تكون كمية كبيرة و بودرة التوم و زعتر مطحون واي توابل تفضليها كيما ترمدي بيها دجاج او كفتة اممم يجي فيها دوق ولا اروع ماشي كيما لاشابلوغ العادية

وهايليك الشكل ديالهااااا

وتقدروو نفس الفكرة الي ما يحب البطاطا يخلي غير الدجاج تاني تجي شابة

نتمنى تكون عجبتكم وصفة اليوم

مرسي سااارو الفوتوغراف ع التصوير ديمااا