السلام عليكم جميعا و ان شاء الله الكل راه بخير
– نجد الكثير يحب يعمل حلويات جميلة و لذيذة و في نفس الوقت تكون اقتصادية لذا حبيت نقدملكم حلوى راني عملتها من بين حلويات العيد ان شاء الله تعجب الجميع و هي حلوى اقتصادية و لذيذة جدا ما تطلبش وقت كثير و تعرف
بحلوى الملفوف
اليكم الخطوات و الشرح المفصل طبعا كيما العادة تكون مرفوقة بالصور
المقادير :
للعجينة :
– 80 غ زبدة طرية
– 80 غ سكر حرش
– 250 غ فرينة
– ½ كيس خميرة كيميائية اي مغرف قهوة
– مغرف قهوة فاني
– 1 صفار بيضة
– حليب سائل
الحشو :
– 80 غ جوز الهند
– 50 غ سكر ناعم
– 2 ملاعق كبار كاكاو مغربل
– مغرف قهوة فاني
– ماء الزهر
– بياض بيضة
الطلاء :
-4 مغارف كبار كاكاو مغربلة
– 3 مغارف كبار سكر ناعم
– 50 غ زبدة
– علبة شوكولا 150 غ او 100 غ
– من3 الى 4 مغارف كبار حليب او ماء او قهوة مركزة يعود الى الذوق
التحضير :
نحضر العجينة في اناء ندير الفرينة + زبدة طرية و ندخل المكونات في بعضها البعض حتى تولي منسجمة
– نضيف صفار+ سكر+ خميرة كيميائية+فاني و نخلط الكل
– نضيف الحليب السائل بالتدريج حتى تتلم العجينة
– نقسمها على 3 كريات و نخليها بجهة ترتاح
تحضير الحشو:
نحضر الحشو في صحن ندير جوز الهند + كاكاو +سكر ناعم+ فاني +بياض بيضة و نخلط الكل و نبدا نبلل بماء الزهر غير بالشوية حتى نتحصل على حشو شوية جاري اي ماهو عاقد او ماهو جاري بزاف متوسط
– على طاولة مرشوشة بشوية فرينة نحل الكرية الاولى على شكل مستطيل
ندير الحشو على العجينة
– نلف العجينة حتى نتحصل على حربوش
– نقطع الحربوش مربعات متساوية ونديرها في صينية ماشي مدهونة
ندخلها للفرن يكون مسخن 15 د من قبل و نخليها طيب على نار متوسطة مدة من 10د الى 15 د قيس مالعجينة طيب ماشي شرط تتحمر وبعدما طابت الحلوى نخليها تبرد و نحضر الطلاء
تحضير الطلاء:
– في كسرونة ندير كاكاو + سكر ناعم + زبدة و على نار هادئة جدا نخلط الكل كي تذوب الزبدة نضيف قطع الشوكولا + 3 الى 4 مغارف حليب على حساب طلاء لازم مايكونش جاري
– نطلي حبات الحلوى و نزينها و نخليها تنشف من بعد نقدمها في لكيسات و تقدم بالصحة و الهنا
ملاحظة :
– كي نخلط العجينة اذا تلصقت معانا ممكن نزيد شوية فرينة ماشي بزاف
– التزيين انت وذوق ممكن نزينها بجوز الهند او مكسرات او وردات من عجينة اللوز انا زينتها بفواكه مصبرة