الوسم: الشامية

الشاميـــــة للسهرة الرمضانية مع احلى عائلة و مزين لحباب كي يتلمو
نبدا
باسم الله توكلت على الله
كوبين ونصف الي 3 اكواب /كاس كبير/ سميد سفينة متوسط وحرش
ملعقة صغيرة دهان لابل /خليه فدرجة حرارة الغرفة/
تقريبا نصف كاس سكر +1 لفاني + رشة قرفة + قرصة ملح +1 ملقعة صغيرة لاليفير /ممسوحة مش عامرة/
ربع كاس زيت
ورشة ماء زهر ورشششة ماء يعني متكثريش
تقريبا كاس حليب /حسب الخليط تع الشامية وكيما قلب اللوز يعني عينك ميزانك ختي/
الفرن سخنيه من قبل ما تبداي
خلطي المقادير الجافة اولا ودخلي الدهان ملح فالسميد بملعقة خشبية ومن بعد ظيفي الزيت وخلطي ومن بعد ظيفي لمسة جميلة للي هي حبات كاوكاو محمرين فالزيت ومهرمشين
وظيفي الحليب وخلطي
وكيما راكي تشوفي فالصورة حجم البلا راهو صغير يعني المقادير على حسابو

دهني البلا وفرغي نص الخليط ومن بعد زيدي فوفو الحشو الي هو حبيبات كاوكاو محمرين فالزيت ومهرمشين ومخلوطين بشوي دهان و عطر اللوز ومن بعد زيدي ما تبقي من الخليط حاولى تغطي كامل سطح الحشو ورشي اللي بقى من الكاوكاو
وديرها فالفرن
اااتونسيو وبلاكي تفتحي الفرن بكري كي تشوفي الجوانب حمارو اشعلي من الفوق
كي تخرجيها ديركت رشيها بالماء زهر غاية
و سقيها بالشاربات اللي ه كواب كبار ماء +كوب ونص سكر وتخليه يغلي مليح كي يقرب يثقل زيديه دائرة ليمون وعود قرفة
لا تنسي الشاربات مش خفيفة لازم تكون كي الزيت فالقوام
وبصحتكم ونتمنى تنجح لكم الوصفة

مشكووورة أختي عالوصفة

شوفي انا مع البدية منت ندير كاس ونص
ومن يعد يديت نكثر من كمية السميد

نتي ديري كاس ونص سميد متوسط نتع البكية والكاس نتع ليموناد بصح ميكونش كبييير بزاف
ومن بعد زيدي كاس من السميد لحرش حتى لو كان تع ميزان معليش
وانتبهي لحجم الصينية راه صغيييير

نتمنى لك من قلبي تخرج كيما خرجت لي
لاني جراتي و خواتاتي داو من عندي الوصفة بل وشافوني كي خدمتها بصح
منيش عارفة هلاه مخرجتش
وبعد ما ترشيها مليح بالماء زهير فوتي على السطح نتع الشامية بقشرة ليمون لكن متغطيش
بالتوفييييق

10 كيسان شاي سميد يكون خشين كيما تاع المقروط
5 كيسان شاي سكر عادي اي احرش
3 كيسان شاي ماء الزهر
قرصة ملح
ملاحظة:
راكي تلاحظي اختي انه كاس الي نشربو فيه الشاي هو مقدار التكيال عندنا .
الشاربات :
رطل سكر
1 لتر ماء
طريقة التحضير"
في قصعة حطي السميد + السكر خلطيهم مع بعض ثم ابداي تزيدي بالتدريج ماء الزهر رشي الكاس الاول و احبكي مليح بيديك لكن ماتعجنيش افركي بيديك برك و زيدي الكاس الثاني و ماتعجنيش رشي فقط و احبكي بيديك راكي رايحة اتلاحظي بلي السكر الي درتيه بدا يخرج في الماء و زيدي كملي الكاس الثالث حتى متحسييش بالسكر كي اتولي تحبكي في الخليط بلا ماننسى ديري شويه ملح. خليه يرتاح شويه مدة 10 دقائق و تكوني في هذه الاثناء حضرتي السنيوة اتاعك و ادهنتيها بالزيت بعثري الخليط في السنيوة بلا ما تخبزيه مسديه فقط من الفوق و ادهني الوجه بشويه سمن ثم قطعيه و زينيه بحبة لوز او كوكاو الشيء الي كاين
دخليه في الفور لازم ايكون اسخون بزاف و لما ايطيب خرجيه اتكوني وجدتي الشاربات بارده سقيه حتى ايعوم بعد ذلك غطيه بسنيوة و عاودي دخليه للفور و خليه يبرد عليه .
ملاحظة:
راهي رايحة تتشكل طبقة سميكة كي اتشربيه ماتخافيش منها السر كله لما تغطيه راه رايحه يطرى و الذوق اديالو ايجيك ايهبل.
و بصحتكم و كل عام و انتم بخير

جاك هااايل مريم…بصحتكم

قال لهم إذا نجحتواالسنة الجاية بانفخها