كيفية عمل الفريك بالتفصيل
هذا الرد مخصوص لاختي روعة2017
كيفاش تحولي القمح الى فريك نتاع شربة رمضان
اول شىء تشتري كمية من القمح من النوعية الجيدة
القمح الجيد لونوا اخضر و ليس اصفر و ريحتوا تفوح لما يتخدم
انا دائما اشتري 5 كيلو يكفيوني و يفضالوا لانه عيلتي صغيرة انا و زوجي فقط و اولادي صغار مايكلوش الشربة و انتى اذا عندك عايلة اشتري 7الى 8 كيلوا
هذا القمح بطبيعتوا يكون فيه قمح محروق بعد الحصاد انت قومي بتنقيته من القمح المحروق جدا و من الاعشاب و حتى الحجر حطيه في سنية و نقيه بكميات قليلة و حاولي تسيريه بسيار رقيق جدا حتى يهبط الغبار و التراب بلاما يهبط القمح
ثم قومي بغسله حطيه في بسينة و كثريلوا الماء تلقاي حبات تطفوا على الماء و اعشاب حاولي تتخلصي منها بالسيار و كرري الغسل اكثر من مرة حتى يصفى الماء و بعدها صفيه في سيار و خليه يقطر مليح و ملحيه كمية ماش كبيرة بزاف من الملح
و بعدها فرشيلوا قماش و حطيه في الشمس يوم او يومين حتى ييبس
و لما ييبس زيدي طلي عليه مرة خفيفة و نقيه كاش مايتخلف
و ابعتيه ارحيه لما ترجعيه سيريه بالسقاط و حاولي تعلي يدك شوية بشكل عالي و تحركي السيار بشكل دائري و تسوطي فيه اي تنفخي فيه باش
تروح منوا النخالة و طبعا وجهك و شعرك كلوا يصبح نخالة ههههههه و كرري العملية مرة او اثنين حتى تروح منوا النخالة و يصير مايطلعش منوا غبار اللي يطيح من السيار راهو فريك و لما تنسفي و تلقاي باعلى الفريك اللي في السيار النخالة تجمعت حاولي تلميها بيدك و ترميها و كرري العملية حتى تنتهي منوا النخالة بين قوسين لازم تتخلصي من النخالة و انتي تغربلي فيه و يطلعلك شوية فريك خشين حوزيه و عاودي ارحيه و اخدميه بنفس الطريقة
و لما تتنحى النخالة حجموا ينقص بطبيعة الحال
و بعدها تطلعلك كمية نتاع فريك خشينة في السيار عاودي ارحيها و عاودي نفس العملية
اخر شيىء جيبي الدقاقة سيار رقيق جدا و دققيه و الغبرة اللي تطلع منوا خبيها تستعملي منها مغرف قهوة مع الفريك العادي باش يجي خاتر و ممكن تستعمليها ايضا لما تلمي الكفتة كي تكون جارية او في مؤكولات اخرى
و كمية الفريك رايحة تنقص بطبيعة الحال لانوا فقد النخالة و الغبرة و حتى القمح المنقى يعني ممكن نخسر منوا كيلوا او اكثر
و هذا شكلوا لما تعمليه
و حطيه في بلارة و اقفلي عليه باش ماتروحش ريحتوا و نسمتوا
و بالصحة و الهنا و اي حاجة مافهمتيهاش راني هنا هه
نتمنى نكون وضحتلك بما فيه الكفاية راني حكيتلك بالتفصيل الممل
و نهار ندير تاعي ان شاء الله نحطلك الصور اذا كتب ربي و كنا من الحيين
بارك الله فيك
و كل من تستفيد من الموضوع بدل ان تشكرني تدعي لوالدتي بالشفاء و شكرا
و الله موضوع في وقته بارك الله فيك ، أختي حبيت نسألك راني مافهمتش كيفاه تنحي له النخالة.
|
الله يسلمك شكرا
|
الله يسلمك شكرا و اللهم امين يشفي امي و امهات المسلمين
شوفي حبيبتي لما ترحيه لازم تسيريه باش ينزل من السيار الفريك المسقم و الفريك الخشين حوزيه وحدوا و عاودي ارحيه
ثم جيبي سيار الدقاقة باش تتحصلي على الغبرة و انتي تسيري اعملي الاتي
باش تنحيلوا النخالة لازمك و انت تسيري فيه تهزي يديك للاعلى و تحركي السيار بشكل دائري سريع و في نفس الوقت تنسفي في السيار تطلع معاك الغبرة نتاع النخالة و انت تسيري بشكل دائري تتجمع تلقائيا كمية من النخالة على شكل دائرة فوق السيار اي حاولي تنحيهاى بيدك و ترميها
و كل كمية تسيريها تعملي معاها نفس الطريقة حتى تخلصيه كامل
هي اصلا اصعب حاجة في عمل الفريك لما نغربلوه و نتخلصوا من النخالة اللي فيه
حاولي ان شاء الله تطبقي كلامي و رايحة تلقايها حاجة ساهلة
