هذه الوصفة و التي تخص كيفية عمل شربة الفريك طلبتها منى الاخت narjes81
شربة الفريك
نبدا بسم الله
المقادير
فخد او صدر دجاجة + قطعة لحم غنم او بقر + بصلة كبيرة او 2 متوسطين مفرومة 3 سنات ثوم مفرومين
عود كرافس +طماطم مصبرة 2 ملاعق اكل
طماطم حب مرحية 2 حبات صغار تكوني فورتيها او غليتيها وترحيها ملح وفلفل اكحل وزيت راس حار اخضر و كسبر مرحي اذا كنت تحبي طعموا و فريك جاهز
طبعا و ملعقة صغيرة غبرة فريك
التحضير
اغسلي اللحم و الدحاج جيدا و احطيه في قدر و اضيفي له البصل و الثوم و الزيت و الفلفل اسود و الملح و الطماطم المصبرة و ممكن تضيفي كسبر مرحي انا مانحطوش و تخلطي كل شيىء و تخليهم على نار هادئة يتقلاو حتى يذبل البصل و تنسايش تحركي ساعة على ساعة
حتى تتقلى مليح ضيفي طماطم نتاع الحب و زيدي قلي شوية و امبعد امرقي بماء سخون و خليها تستوي حتى يطيب الدجاج و يقرب يطيب اللحم امرقيها بكمية من الماء و خليها تغلي و بعد ما تهز الغليا ارمي كاس صغير او نصف كاس كبير من الفريك و الفلفل الاخضر اذا ماتحبيش الحار خليه مغلوق او استغني عنوا و نقصي للنار و خلي الفريك يطيب على الاقل ساعة او اكثر و ماتنسايش تحركي ساعة على ساعة باش مايعجنش الفريك كي تنشف امرقيها بماء ساخن و بعدها ضيفي غبرة الفريك و عود الكرافس و خليها تغلى 20 دقيقة حتى تختار و طفي عليها
ماتخليش المرقة عاقدة الفريك بعد ما يبرد يتكاثف و حطيها في غميقة و زينيها بدبشة مقطعة رقيقة
ملاحظة
ممكن تعملي شربة الفريك بالدجاج فقط او باللحم فقط اذا ماتوفروش الاثنين و اذا توفروا راهم يزدوها بنة ايضا ممكن تستبدلي اللحم بكريات من الكفتة مداوية و ارميها تطيب بعدما تمرقي
و شهية طبية
|
الله يسلمك حنونة راني في الخدمة و ان شاء الله نهار تجربيها رديلي خبر
بارك الله فيك ويعطيك الصحة
|
الله يدخلوا علينا بالصحة و اليمن و البركات
و فيكي بارك الله شكرا حنونتي
فى الحقيقة رانى كليتها فى قسنطينة وعجبتنى بزاااف وجيت لدارى وجربتها لكن مجاتنيش كما الى كليتها معرفتش وين سر اللدة نتاعها وشكرا مرة اخرى
|
العفو حنونة
شربة الفريك من تقاليد القسنطينيين و يتقنوا طبخها و ان شاء الله عاودي ديريها و مع الوقت تتعلمي سر البنة نتاعها
نورتيني حنونة
|
الله يسلمك شكرا
