بسم الله الرحمن الرحيم على بركة الله نبدأ
راني اليوم راح نبدأ باول طبق الي هو الشخشوخة على الطريقة العنابية ومستنيا من الاخوات طريقتهم ادا كانت مثل طبعا يقولو نفس الطريقة بالولاية الفلانية وادا كانت تختلف يقوللنا الطريقة في ولايتهم مع تسمية اسم الولاية
يلا على بركة الله نبدأ:
انا راح نحط طريقتي بصح الصور راح استلف من النت اوك
أولا العجين او الشخشوخ:
السميد + الماء + الملح
طبعا الكمية كما تشائين
تخلطيهم وتعجني وتقرصي بالواحدة تكون ماهي رقيقة بزاف ما هي خشينة بالزاف واطيبيها في المرا او الطاجين الممسوح افضل والا ما كانش مش مشكل اي طاجين
واكون طيبها خفيف يعني دوب ما تشم النار تقريبا كيما هاد الصورة :
نحيها واسميها على اربعة والا حبيتي يجيك التشخشيخ ساهل وهي سخونة بالموس حاولي تقصيها اعراف اعراف ولميها في طبة ومن بعد في شكارة تاع بلاستيك باش ما تيبس مهم جدا لانك الا خليتيها عريانة البرا راح تيبس ويصعاب عليك تشخشخيها
وفتيها صغيرة وحاولي تكون متجانسة وتحصلي بالاخير على هاد الشكل:
ممكن اطيبيها في نفس اليوم وممكن تيبسيها وتخبيها واطيبيها وقت ما حبيتي بصح الطريقة في التفوار تختلف الي نهارها ما تحتاجش تفوار ياسر واليابسة لازم تزلقيها بالزيت وترشيها بالماء وتفوريها اكثر من مرة
يلا ضرك نروحو للمرق :
لحم او دجاج الي عندك انا نفضلها بالدجاج + بصل مرحي + ملح +فلفل اكحل + قرفة
الطبيعي طبعا تقلي الدجاج في الزيت مع البصل وتفوحي ومن بعد تزيدي الحمص وتمرقي تخليها تغلي مليح وتزيدي شوي طماطم يعني تعطيها برك لون برتقالي والا حبيتيها بيضا ماشي مشكل انا نحب نحط شوي طماطم ديما على الاخر
بعد ما تشوفي البرمة تمرقت واللحم او الدجاج تاعك طاب صفي الحمص وادجاج او اللحم وحدو في كسكاس
ومن بعد طبعا ما تكوني فورتي الشخشوخة تاعك مرة او امرتين وشفتيها طرات حطيعا في البرمة وصبي عليها المرقة تكون ديما المرقة اكثر من الشخشوخة خليها تغلي حتى تطرا مليح وتتشرب المرقة
حطيها في صحن وحطي شوي زبدة ومن فوق الحمص والدجاج او اللحم وتكوني ثاني طيبتي زوج بيضات شرشمتيهم وقصيهم على اربع وزيني بيهم
وبصحتك :
ان شاءا لله تكونو فهمتو الطريقة لاني عارفة بالصور تكون اوضح بصح راني مش عارفة وكتا ممكن نطيبها خخخخ
يلا مستنيا طرقتكم هل هي مثل هده او تختلف واين الاختلاف هاد هو المهم بالموضوع
شكرا على الطريقة
ننتظر جديدك
ام رحاب وان شاءا لله تكوني كليتيها وتعلمتي تعمليها والا ما عجبتكش؟؟
بصح حنا منديروش القرفة ونفتوها بيديدنا
بصح طريقة الكسرة نتاعك تهبل ومتديش الوقت كي تعودش تشخشخي فيها
ننتظر جديدك
مي دوكا ما نقدرش نخاف الرجيم يروحلي هههههههه
يعطيك الف صحة أم أمين
حنى نقولو لها الرفيسة
احنا نديرو في منطقتنا شخشوخة السيار
هي تشبه شوي لشخشوخة الظفر
وسبق وحطيت وصفتها بالتفصيل
شخشوخة السيار من مطبخي
