راديو الفهامة ******* و القعدة علامة 2024.

هبطت لقاع البحر ، فرّشت زربية ، خرجت لي جنية ، قالت لي واش بيك يا بنية ؟ قلت لها راحوا حبابي و خلاوني وحدانية

راني براني عايش وحداني في مارساي انا نريزارفي نلحقها

رشّيت عتبة الباب بالزهر و الطّيب ، وسقيت كل الأحباب بالعسل و الزبيب ، و كى نسيت جاني جواب كنت نستناه من عند البعيد

بايت نقرى فميساجك ماجانيش النو آه يا قلبي ما صابك تتعب كل يوم

مدّيت لقاع البير و فرّشت زربية ، حرقست حرقوس ذهب من راسى لوذنية ، فرحي يا يما سعدى زها ..و استشفاي في العدو إلى استشفي فيّ

انت ذهب من دون ما تلبس ذهب وشله تروح للسوق ودور عليه

يما يما ديريلي تويقة في وسط الحديقة باش نشوف زهرى كي تجيبو ذيك الوريقة

سحارة مالقات مادير كرهت غير من الدعايات سحارة حابة تتزوج و تتهنى كيف لبنات

عسل يا عسل في باقة خضرا ، يا شميمت العاشقين يا قمرا ، حلف سيد الملاح ما يرأس أمر غير إذا جات غزالته باش تكمل الحضرة

سي تا دير عمري جتام سي تا دير ندير معاك الدار غابتلي و مالقيتش كلام رديلي اعطين إسبوار

الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوب

نتي هي المخيرة فيهم ونتي عندي لالاهم و كي نشوفك ننساهم

خرجت نهار الجمعة ، في يدى شمعة ، قالولي أمسحى ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة

زغرتو يا لبنات العمات و الخالات لعروسة راها جات و القعدة راها حلات

حوم حوم يا حوام ، حوم فوق السطح العالي ، و قول لها يا لالة يا زينة لبنات و خدودها براقة ، و عيونها غرّاقة ، صارت كل القلوب ليها سبّاقة

لو تعرفوه ابقو سالوه الزيو والزي حالو في بالو او مش في بالو

يا شمس واش بيك ذابلة ، إلا لابيك الزين راني نفكر فيك ، و اذا بيك الزهر ربي ما يتخلي عليك

نسنيي معاكبالعشرة و معاك نسنيي بطول لعمر بيني وبينك عشرة نقولها ونزيد نهدر

محبس منقوش ، مربي على الفشوش ، ما يحمل الهانا ، أصبر يا خاطري حتى يفرّج مولانا

من يوم بعدك و انا البي مكسور وحزين محتار مش عارف الدنيا وخداني لفين

جزت على جنية ، قالت لي واش تحوسي يا ولية ، قلت لها مانى نحوّس لا على مال ولا على جاه ، نحوس على من ضيّعت قولي ليا

كان يا مكان في داك الزمان كان عندي حبيبتي وسمها منال

نبعث لكم دموعى في مشوار ازرق ، و نبعث كلامي في برية تحرق ، ما ننساكم يا ناسى بحق مكة و بلاطها لزرق

نبغيك أنا نبغيك ماتقوليش ننساك ما تقوليش ننساك

آلك كاينة قرية و فيها حفرة…. ألك كل يوم يطيح فيها واحد ….. واحد يلحقو عليه

… والثاني يموت … ألك تجملو ناسها باه يديرولها حل …آلك و تفاهمو

يديرو حل من الحلول التلاثة … ألك يشريو سيارة اسعاف و يحطوها قدام

الحفرة… ولا يبنيو سبيطار مسامي الحفرة …. و لا يردمو الحفرة و
يحفرو وحدة قدام السبيطار نتاعهم

ألك كاين زوج مزطولين آلك تخاطرو واحد يقول رانا في النهار و لوخر يقول رانا في الليل آلك جا حالسيد عاقب سأساوه قالولو رلنا في النهار ولا اللي آلهم نو انا ما نسكنش هنا

آلك كاين واحد حالنهار دخل للفارماصي آلو اعطيني ربطة نعناع آلو يا خويا هدي فارماصي ماشي مرشي … آلك زاد جاه غدوة و عاودلو نفس الكلام .. آلك عاد توجور يجيه على النعناع آ لك تقلق الفارماصي و راح جاب النعناع..آلك جا داخل السيد قالو عندك النعناع قالو وي كاين ..قالو سبحان الله جامي شفت فرماصي يبيع النعناع

آلك كاين حالطفل قال لباباه .. يا بابا راني حلمت بيك البارح عطيتني عشرة آلاف
قالو باباه هات ردهالي كنت نقصر معاك برك

آلك كاينة حالعجوزة راحت للطبيب مع وليدها ألك قالو الطبيب يماك عندها مرض الوحدة و لازم تشوفلها واحد في عمرو 50 سنة آلك راحت تمشي هي و ليدها ومن بعد قاتلو راك تشوفي وليدي ربي يعاونك وين راح طيح في مول 50 سنة لوكان ماتلقاش شوفلي زوج نتاع 25 سنة

آلك كاين حالسيد مسافر هو وصحابو آلك طريق كاملة وهو يقول كون غير جبت التلفزيون آلك كي وصلو للمطار قالولو اسكت علينا واش راح دير بالتلفزيون
قالهم الباسبورات راهم فوقو

ألك كاين حالسيد حاب يزور 10 آلاف آلك راح جاب 100 ألف و نحالها صفر

آلك كاينة حالمرا قالت لراجلها كون غير ديت إبليس و ما ديتكش نت آلها يخي حرام واحد يتزوج بختو

آلك حالسيد توجور مزطول آلك حانهار شاف بلاكة مكتوب فيها مزرعة البقر آلك راح صقصى الراعي قالو كيفاش تزرعو البقر قالو الراعي و هو يشيخ بيه نذريو السكر ينوض بقر آلك راح السيد لدارهم و رمى شوي سكر آلك كي ناض الصباح لقى النمال فوقو قال يا عمري بقرات صغار يهبلو

آلك حالمعلم قال للتلامذة نتاعو الي يحس روحو غبي يقوف آلك وقف واحد برك
قالو المعلم نت تحس روحك غبي قالو لالا مي ماحبيتش نخليك توقف وحدك برك

هنا رانا خلصنا علابالي الميضوع نتاع اليوم طويل ما يضحكش واش راح ندير السوجي نتاع الصيام ما جاونيش فيه هدرات يضحكو باسكو كنت نحكي على المشاكل
المرة الجاية إن شاء الله نجيبولكم ميضوع يضحك شوي
هيا راه سبر الآراء ليكم ديرو فيه رايكم
هالبقاولنا على خير و صح رمضانكم