اولا الوصفة شفتها في قناة سميرة
جربتها وصراحة ذوق لا يقاوم
وخطواتها بسيطة ..صح تحكم الوقت
بصح تستاهل
نبداو باول خطوة
تحضير الجينواز
وهذي طريقتي فيها ..لكل بيضة 30 غ سكر و 30 غ فرينة رشة ملح وفاني
استعملت 5 بيضات في مول كبير
ومن بعد قطعت بالقطاعة لي راح نحط فيها الكيكة
2 دوائر والثالثة من بواقي الكيك تحصلت على زوج انصاف
يعني المجموع 3
ثاني خطوة تحضير كريمة الحشو
لاكرام باتسيير
نخبط بلافوي 150 غ سكر و 50 غ نشا وفاني و3 بيضات
نسخن نصف لتر حليب
ومن بعد نضيف الحليب تدريجيا ونرجع للنار حتان يهز الغلية ويبدا يخثار نطفي
وننضيفلو مباشرة 15 غ جيلاتين غبرة ونخلط ملييييييييييح
نجيبو لاكرام فراش حوالي كاس كبير
نخفقها مليح
ومن بعد نخلطهم مع بعض
نجيب القطاعة وندهنها مليح بلاجولي من داخل باش يسهل نزعها فيما بعد
ونحط انصاف دوائر الاناناس مع حبات الكرز
ونفرش فوقها اول طبقة من الجينواز ونحاول مانخليش فراغات ونسقيها بسيرو الاناناس المعلب
ونصب كمية من الكريمة ونقطع عليها موز واناناس قطع صغيرة جدا
ومن بعد طبقة الجينواز المقسومة على 2 باش ماتبانش 
ونزيد طبقة كريمة وفواكه
ونغطي باخر طبقة وهنا مانسقيش بالسيرو
نغطيها بالفيلم اليمونتار ونخليها ليلة كاملة في الثلاجة حتى تتماسك
هنا بعد ما باتت وبردت
نحيها من القالب بحذر
نزينها بطبقة خفيفة من الشونتيي والفواكه ندهنها بلاجولي
وهنا بعد ماوجدت
نتمنى نكون وفقت في الشرح كيما يقولو 
اي سؤال او استفسار
يرجى الاتصال بالحصة
ملاحظة اخيرة
اذا بقالك من الجينواز والكريمة
تقديري تخدميها ديسار في اكواب التقديم
تقتفي الجينواز وتسقيهاا ثم طبقة فواكه ثم كريمة وتعاودي نفس الشي
وفي الاخير تزينيها تجي هايلة
مرسي على الوصفة
تحيآآآآتي..
بارك الله فيك و جزاك خيرا
يعطيك ما تتمناي على الوصفة
|
اخدميها في الدار خير باش تتحكمي في كمية السكر والكثافة
—
يعطيكم الصحة لبنات على الردود ..تسلمولي 