كعكة بالشوكولا والموز بالصور من مطبخ المجنونة رسمي 2024.

6 بيضات – 16 ملعقة سكر خشن – 16 ملعقة زيت – 16 ملعقة حليب
16 ملعة فرينة – 4 ملاعق كاكاو – زوج خميرة – زوج أكياس فنيلا

ونروحو لطريقة التحضير
أولا نفرقو بياض البيض عن صفارو
وكل واحد نحطوه في وعاء وحدو

من بعد نجيبو الـ batteur ونضربو البياض حتى يطلع
كيما باين في الصورة والصفار تاني

نخليو البياض على جهة من بعد نحتاجوه
نجيبو السكر نحطوه على صفار البيض+ لحليب نكونو سخناه باش يذوبلنا السكر
من بعد نزيدو الزيت ونزيدو الفرينة وأكيد نكونو نضربو فيهم
بالباتوغ ونزيدو الكاكاو والخميرة والفنيلا ونخلطوهم مليح
بالباتوغ وفي الأخير نجيبو بياض البياض ونسكبوه فوقهم
ونزيدو نخلطو بالباتوغ وهكذا ما يبقى غير الفوغ نحطوه
يسخن والنتيجة تكون هكذا

نحطو الخليط هذا في الفوغ يطيب على نار خفيفة حتى تطيب
الطاغت نخرجوها ونزينوها كيما نحبو

ودرك نوريلكم طريقتي في التزيين

أولا وقبل كلشي
أنا وجدت الشوكولا مذوبة مع لحليب وتكون سائلة بزاف
يعني كثرت لحليب وسقيت بيها الكعكة باش ما تجيش شايحة

وثانيا
أنا استعملت الشوكولا و la crème chantilly
كي طابت الكعكة خرجتها وقسمتها لزوج طبقات واستعنت
بخيط الكروشي باش قطعتها على زوج
وحضرت la crème chantilly والطريقة كالآتي
100 غ من بودرة الكريمة مع كوب حليب
ونضرب الخليط حتى يطلع ويصير كريمة

وحطيت الكريمة فوق الطبقة الأولى من الكعكة كيما تبين الصورة

من بعد قطعت الموز دوائر وحطيتهم فوق طبقة الكريمة

من بعد جبت الطبقة الثانية وحطيتها على الطبقة الأولى
( ما عرفتش نسايسها مليح راهي تقسمتلي )

من بعد ذوبت الشوكولا مع شوية حليب ومغرف كاكاو ونصف
ملعقة زبدة باش تجي تلمع وغلفت بيها الكعكة

من بعد حطيت كريمة الشونتيي في الحقنة الخاصة بالكريمة
وزينت الكعكة من فوق وكتبت عليها واش حبيت