صباح الخير لبنات
جبتلكم طريقة تحضير البركوكس
رطل عيش مشري
بصلة مفرومة
3 فصوص ثوم
توابل: فلفل أسود+ كمون+راس الحانوت+ كسبر+ ورقة رند + قليل من النعناع + ملح
زيت
طماطم مجففة
فلفل أحمر + فلفل أخضر
لحم مجفف (قديد) نشمخو شوية في الماء قبل ما نحطو في الكوكوت باش يتنحا الملح
شحمة
طماطم مصبرة
فول مجفف
بطاطا + الخضر لي تحبي أنا درت غير البطاطا
ماء
ملاحظة: الملح مانديروش بزاف لأن القديد يكون مالح حتى كي نشلوه بالماء
– أول حاجة ديري ماء في قدر يسخن
ديري شوية زيت في العيش ومبعد بخيه بشوية ماء
حطيه يفور فوق القدر لي فيه ماء يغلي
– من جهة أخرى
حطي البصل والثوم والقديد والشحمة وشوية زيت خلي الكل يتقلى ضيفي التوابل والطماطم المجففة وملعقة كبيرة طماطم مصبرة وزيدي مقدار فنجان ماء وقليهم جيدا
بعدما تتقلى مرقيهم بالماء المغلي واقفلي الكوكوت باش يطيب القديد
كي تفتحي الكوكوت بعدما يطيب القديد تاعنا ضيفي الفول والبطاطا وزيدي مرقيها شوية واقفلي الكوكوت مرة ثانية
بعدما تكون طابت المرقة تاعنا لوحي الفلفل يغلي شوية ومبعدا طفي
وما تنسايش العيش تاعنا لازم كلما يفور ننحيه نرشو بشوية ماء ونخليه يبرد شوية ونعاود نردو يفور
حتان نشوفو طاب
نملحو شوية ونروح للكوكوت ننحي نصف المرق على جنب
ونحط العيش في المرق لي كاينة في الكوكوت
نخليه يتجمر شوية
ومبعد كي نسربي نضيف المرق المتبقية
شهية طيبة
ربي يعطيك واش تتمناي .
ربي يسعد أيامك
يعطيك الصحه يا لفحله