هذو تلاميذ ولا متسلفينهم من الموزمبيق الشقيقة ههههه؟! 2024.

وآش راكم ناس اللمة توحشتكم بزاااف،~
إن شاء الله كل واحد فيكم راه بصحة و خير و عافية و اللي مهموم ربي يفرج عليه إن شاء الله،~

كما تعرفو صحآب الليسي كملوا الإختبارات تهناو (أنا أول وحدة فيهم)، و صحاب البآك راهم يروليو مساكن ربي يوفقكم إن شاء الله، و صحاب الجامعة اللي رايحين يبداو لي كونطرول نهار السبت إن شاء الله ربي معاكم،

المهم هذي مدة ما حطيتش موضوع هنا، و كي جيت اليوم حبيت نحط موضوع على الطوايش نتاع التلاميذ، bon نبداو حكاياتنا ♥~

♦•♦ ♦•♦ ♦•♦

كما تعرفو التلاميذ كي تخلاص السنة يبدا التمهبيل و الطوايش، أيا العام اللي فات في الليسي نتاعنا كما كانت راح تخلاص السنة، التلاميذ جابو الطماطم و البيض و بداو يطيشو فيهم من الفوق، جات طالعة وحد الأستاذة جات في راسها حبة بيض تكسرت عليها ههههه،.. تبهدلت مسكينة

♦•♦ ♦•♦ ♦•♦

و كما تعرفو ثاني كي يقرب العيد ولا المولد النبوي يبداو التلاميذ يشرو المحارق و يطرطقوهم في الليسي، وحد المرة كانو التلاميذ يطرطقو في المحارق، جات فايتة أستاذتنا نتاع الأدب، قاسوها بالمحريقة، مزية اللي جاتها ثقبة في خمارها و ماجاتش فيها هي، مي هذاك النهار دارتلنا درس في الأدب و التربية ههههه، مي الحاجة اللي تعجبني أنو المدير و المراقبين كي يشوفو المحارق ما يدروروش كامل يخافو ويلا تجي فيهم خخخ

♦•♦ ♦•♦ ♦•♦

خطرة ثاني وحد الأستاذة مديتها في روحها بزاف(تقري في الكلاصة اللي قدامنا)، أيا وحد المرة حطولها الـcola rapide في الكرسي، هي قعدت كي جات تنوض لصقت الطابلية نتاعها في الكرسي، في هذاك النهار دارت حالة، قالتلهم قولولي بالسيف شكون اللي دار cola rapide هنا، ما حبوش يهدرو، تحلفت فيهم، من هذاك النهار و هي تحرق فيهم في لي نوت، مي فات العام عليهم سلامات و الحمد لله ههههه،

♦•♦ ♦•♦ ♦•♦

وحد المرة كنت واقفة أنا و صاحبتي بقينا نحكو ما فقناش لرواحنا، حتى التلاميذ دخلو علينا للكلاصة، و حنا رانا نحكو نحكو حتى جا لينا المدير تخنزر فينا و قالنا: نجيبلكم القهوة هنا؟؟، نضنا نضحكو و سكيـvـينا ديراكت،

♦•♦ ♦•♦ ♦•♦

وحد المرة كنا في حصة الرياضيات، مالا صونا البورطابل نتاع واحد الطفل يقرا معايا، كي سمع أستاذ الmath لاصونري تقلق و قالنا 1000 مرة و أنا نقلكم صكرو علينا البورطابل، شوية هكذا يا ربي نص دقيقة صونا بورطابل الأستاذ، قالو التلميذ 1000 مرة نقلك صكر علينا البورطابل…ههههه.

♦•♦ ♦•♦ ♦•♦

و اللي قاتلهم أرقدو، اليوم طفل جا يفوت الإختبار، جاب طوموبيل مركّب فيها 4 من صحابوا، و جابهم لليسي، أيا حبس عند الباب، ألوغ العساس كي شاف الطوموبيل يحسب كاشما أستاذ ولا المدير، أيا فتحلهم الباب، و الطفل هذاك دخّل الطوموبيل لليسي، و gـارا الطوموبيل نتاعو كما طوموبيلات الأساتذة، و كأن شيء لم يكن، و كي كملوا الإختبار عاودو ركبو و عادو إلى بيوتهم فرحين مسرورين ههههههه.

♦•♦ ♦•♦ ♦•♦

و مازال كاين طوايش صراو، تالمون بزاف نسيتهم، كي نتفكر راني نرجع ليكم في الردود

توتة توتة خلصت الحتوتة

ضرك جا دوركم أنتوما أحكيولنا على كاشما طوايش درتوهم في الليسي يا أشرار ههههه

سلآم.