اليوم درت محاجب كيما يديروهم دار راجلي في مستغانم والطريقة تختلف علينا في الوسط وحبيت نوريهالكم يجو ملاح ومشي معجنين ولاصوص متخرجش تاني تاكلي حابة تشبعي
الطريقة والمقادير
نحطو الفرينة+السميد نفس الكيلة نلموهم بالماء والملح //كيما المسمن//ونعجنو مليح وكي تطرى العجينة وتولي تطرطق //عرفتو تقراوها//نغطوها بنيلون ونخلوها ترتاح اي عجين يحب الراحة من الافضل تعجنيه الصباح وديريه عشيا ميتعبكش المهم في هدا الوقت نوجدو لاصوص انا نديرها بصل+طماطيش تاع الحبة+مصبرة وندير كمون+ف.اكحل+ف.عكري ونقطع البصل رقيق ونديرو يتقلى ونرابي الطماطيش+ليزيبيس+الملح وكاس ماءونصف ونغلق الكيكوطة طيب بلخف وتجي بنينة وكي توجد نزيدلها الفرماج وزيتون بلا عظم مقطع رقيق والهريسة اختيارية
نولو للعجينة ونقرصوها نديرو كريات كيما تع المسمن ونديرو كريات اخرى اصغر منها هادو يسموه الرقاق نديروهم نفس الحساب كل مسمنة تقابلها رقاقة ونعاود نخليها ترتاح
كي تطيب لاصوص نخلوها تبرد وبعد ما ترتاح العجينة نبدى بالرقاق ///الكريات الصغيرة نحلوها بالزيت ونطيبوها كيما تبين الصورة المهم نطيب ونحط حتى نكملوهم منبعد ندور للمسمنات //الكريات الكبيرة // نحلوها مليح نديرو رقاقة في الوسط وندير لاصوص في الرقاقة ونطويها مربع ونطوي فوقها المسمنة ونطيبوها عادي
ملاحظة كيما نديرو المحاجب نديرو المسمن يجي تاني مليح بالرقاق وان شاء الله نكون فدتكم بهادي المشاركة البسيطة ونخليكم مع الصور
انا تاني راجلي مستغانمي مداري كينديرله تاعنا تاع وهران ماشي كيما هكا حنايا نديروه يعجبه و يقولي حنا تاعنا هاكيداير هو تاني حبه والمحاجب مزيا عطيتيني هاد الطريقة باه نديرهاله
شكرا لك اختي
|
يعطيك الصحة
بصحتك
جاوك هبال أختي ربي يحفظك
بصح هادو يجو فووووور 