السلام عليكم ورحمة الله وتعالى وبركاته
كيفاه راكم ان شالله تكونو بخير ومادامكم في اللمة اكيد راكم بالف خير
ما نطولش عليكم درت لي كراب وجاو ملاح حبيت نحطهملكم اذا عجبوكم تديروهم
مقادير عجينة لي كراب نتحاجو:
160 غ فرينة
4 بيضات
1/2 لتر حليب بارد
5 مغارف زبدة ذائبة وباردة ما تكونش سخونة
قرصة ملح
نطلعو البيض بالخلاط ونزيدولو الفرينة بالتدريج والملح بعد ذلك نضيفو الحليب بالتدريج في الاخير نديرو مغارف الزيدة بعد ذلك نتحصلو على خليط نجطوه في الثلاجة ساعة الا ربع او ساعة ومباعد نخرجوه من الثلاجة ونطيبوه في مقلاة تيفال على الجانبين
———————————
نقومو بتحضير الحشو
صدر دجاج+بصلة+ملح+فلفل اكحل+شويا كسبر مرحي وشويا فلفل احمر+ نعناع اخضر مقطع
بعد ما نحمصو البصل في الزيد نضيفو صدر الدجاج اللي كنا رحيناه مع المكونات المتبقية ونحمسوهم
بعد ما يطيبو نضيفو الفطر اللي كنا قطعناه
من بعد ما نكونو طيبنا لي كراب وحضرنا الحشو الان نحشيوهم
ونحضرو صلصة البيشاميل
3 مغارف زيدة
3 مغارف فرينة او مايزينة
شويا فلفل اكحل وملح
1/2 لتر حليب
نذوبو الزبدة ونزيدولها الفرينة توليلنا عجينة متماسكة
نفيضو الحليب ونضيفوه بالتديرج مع التحريك المستمر
بعد ما نكونو حضرنا كل شي نبداو في التحضير الاخير
ندهنو البلاطو بالبيشاميل ونحطو فيه لي كراب اللي حشيناهم
حتان نوصلو للاخير
ومباعد نحطو الباقي نتاع البيشاميل فوق لي كراب واذا بقالنا الحشو نذريوه عليهم
ونذريو عليه الغرويار وندخلوه للفرن
بعد ما يطيب نخرجوه من الفرن وهذا شكله
ونحطوه في طبسي جماعي او فردي
*********************
وبالصحة والعافية عليكم
وكيما نقوللكم ما تضحكوش عليا
هيا ورولي اراءكم وردودكم على طيابي
صاحيتي مناكلش راني زعفانة بصح بيناتنا جعت هاتي قرصة نرهج
باينة لذيذة.
مشكورين عىل المرور العطر
يعطيك الف صحة يالشاطرة
وعجبتني فكرة الحشو دجاج
كاش نهار نجربها
سلمت يداك عفاف
ربي يبارك فيك ويحفظلك ندوش
انا الصراحة ما نحبش الحشو نتاع اللحم بزاف
اكثر اكلاتي بالدجاج المرحي
ربي يبارك فيك ومشكورة على المرور