جبتلكم طبق مشهور ولذيذ يتعمل كذلك في الاعراس
هو اللحم لمفور
المكونات
لحم مغسول مقطر
بصل + ثوم + دبشة + فلفل اسود + كمون+ بابريكا حارة وحلوة حسب الاختيار + توابل انا كان عندي توابل خاصة باللحم ملح وقليل من الزيت + طماطم مصبرة
الاضافات من عندي
كرام فراش وعصير وقشور الليمون الاخضر والصويا
نحطو المكونات في مكسور او ترحيوهم برحاية اليد ونرحيوهم مع فنجان من الماء
نفرغو الخليط على اللحم ونخلطو حتى يتغلف بالصوص
نحطو طرف اللحم في ورق الالمنيوم ونغلفوه
ملاحظة : هنا تقدري تضيفي خضر بطاطااو جزر او جلبانة وفطر يعني وش حبيتي انت انا عملتو مع فلفل ودبشة فقط
بعد ما نكملو القطع تع اللحم نحطوهم في الثلاجة ليلة كاملة او كيما تحبي ساعتين او ثلاثة حسب الوقت تاعك
كي جي تحطيهم يفورو
نثقبو القطع المغلفة بموس باه يدخل البخار ونحطوهم في كسكاس ونحطوه فوق برمة معبية ماء
باه ما تخليش البخار تاعك يخرج انا طريقتي نعمل جريدة ندير فيها ثقب كبير في الوسط ونحطها على فم البرمة( ماشي تقعدو تقراو في الجريدة كيما نديرو بكري ههههه ) ونحط الكسكاس مستحيل يخرج البخار
وباه ما تخليش البخار تاعك يروح هدر خخخخخخ غلفي الكسكاس بكيس بلاستيكي او بافرشة البلاستيك تع السنوات لي نديروهم في العرس محال يخرج البخار وخليو اللحم يفور
هاو طاب اللحم تاعنا ولا زبدة تصدقو بلي العظم طار وحدو
ملاحظة مرة على مرة افقدي البرمة تاعك لا تنشف من الما اذا نشفت حاولي تضيفي الماء المغلي هاك ما تحبسيش عملية الغليان والبخار
انا برمتي ما نشفتش يعني حطيتلها الما ومازدتش لانو غطيت اللحم مليح والبخار لي يخرج يولي على شكل قطرات
مدة الطهي حوالي 4 ساعات
انا حطيتو على 7:30 حتى وقت الغداء
وان شاء الله يعجبكم وتجربوه 
نجربها بإذن الله
شكرا حبيبتي على مجهودك والشرح الوافي
تقبلي مروري المتواضع
درتيلو الصح كيما يلزم الروح ما كانش منين تخرج هذا جرنال هذا كيس بلاستيكي
يعطيك الصحة
والبرمة اذا تحرقت بعد 4 سوايع نديرولها لاستيس نتاع ساندريلا بالملح وانتهى المشكل ههههههه
– نتاع تفنيين باش ما نظلش نطل عليها –
444444444444
انا عندي كوكوت فيها الكسكاس ما نحتاجش الغطاء تاع السني
بصحتك اختي حدة و يعطيك الصحة على الطريقة جزاك الله خيرا
|
الله يسلمك اختي ان شاء الله تعجبك