السلام عليكم ورحمة الله
بعد أن التوت (بتسكين اللام وفتح التاء والواو،،، التوت من اللوي وليس التوت الذي يؤكل) نواصل، بعد أن التوت ألسنتنا من التحدث إلى الشباب المسلم عن الجنة وطريقها، وبعد محاولات الشباب المستميته للعثور عن جميع الطرق المؤدية إلى جهنم، ها أنا ذا أقدم لهذا النوع من الشباب، طريقاً أكثر اختصاراً لدخول إلى جهنم Shortcut بالإنجليزي:
1- اصحا الساعة 2 بالليل ودق جرس جارك بشكل متكرر ومقزز ثم أطلق ساقيك للريح (أفركها) بس لازم تتأكد أنه جارك ما يصلي قيام الليل، علشان ما تكسب أجر إيقاضه للصلاه.
2-البس ملابس زومبي ودور على أولاد جيرانك وتخبا لهم ورا الزبالة، وأول مايقربوا منك أطلع لهم بشكل سريع ولا تشفق على أحد فيهم خصوصاً أذا شفت واحدهم يسويها على سرواله.
3- الساعة 6 الصبح وقبل ما يطلع جارك للعمل اطلع بسرعة وحط مسمارين عند عجل السيارة، وحد قدام العجل وواحد خلف العجل، علشان إذا تقدم لقدام أو رجع لورى يفقع عجل سيارته.
4-عند العصر جمع كل الزبالة والأوساخ إلى عندك في البيت(فتش جيوبك كويس)، واطلع بسرعة وكب كل الأوساخ أمام بيته، واذا أحد شافك بتسوي كذا قله :: أنا وقعت ووقع الكيس معي، وإذا قال لك: لكنك لم تقع وقد رأيتك، فقل له:: إذا أنت أحول وعيونك ضاربه أنا إيش أسويلك.
5- اشتري كرتونة موز واقعد عليه يوم كامل وانت تاكله، بس لا ترمي القشر، جمعه، وفي اليوم التالي حط على كل درجة من درجات السلم ثلاثة قشور موز، حتى اذا ماتزحلق جارك في الدرجة الأولى تزحلقة في الدرجة الثانية، وإذا ماتزحلق في الدرجة الثانية فأكيد راح يتزحلق في الدرجة الثالثة.
6- مد حبل على مدخل باب العمارة وارخيه، واخفيه بأي حاجة، وامسك بطرف الحبل واتخبى ورى الجدار، وأول ما تحس ان جارك قرب ،،، شد الحبل بسرعة.
7_ اذا شفت اولاد جارك يلعبون بسيارات صغيرة، وهم ميتين من الفرح، روح اشتري سيارة رموت كنترول واللعب فيها قدامهم.
8- اذا شفت جارك مرض، أوعى تزوره، عشان ما تكسب أجر، ولا أقولك ،،، روح زوره، يمكن ينجلط أول ما يشوفك بسبب عمايلك فيه.
9- اعزم جارك على البر، طبعاً لازم تأخذ معك ثلاثة كيلوا لحمة عشان الكباب (يعني كأنك بتتصالح انت وإياه) وأول ما توصل للبر قله:: ييييييييييييهههه، أنسينا اللحمة، ارجعوا مرة ثانية للمدينة، وأول ما توصل للحام، قول لجارك :: ييييييييييهههههه، اللحمة معانا بس أنا ناسي، واطلعوا مرة ثانية للبر أول ما توصلوا لهناك قوله :: أقولك شيء، بطلت أصالحك، قب وجهك، وأتركه في البر وارجع للمدينة
10- اكتب رسالة حب بإسمك واسم زوجة جارك وأول ما يعدي جارك أرمي الرسالة جنبه، اذا تأكدت أنه ما طلقها من أول يوم، سوي الحركة هذه مره ثانيه في اليوم الثاني.
11- أوصل أسلاك الكهرباء والتليفون لبيتك مع أسلاك الكهرباء والتليفون مع بيت جارك وخلي كل فواتيرك عليه.
12- بعد ما يطلع جارك إلى العمل اتصل على زوجته (اذا ما طلقها من الخطوة رقم 10)وقلها: والله يا أختي زوجك عمل حادث وهو الآن في المستشفى في العناية المشددة بسرعة روحيله.
13- اتصل على الشرطة وقولهم أنه في حرامي في بيت جارك، واتصل على الجنائية وقلهم انه جارك مهرب مخدرات، واتصل على الدفاع المدني وقلهم انه بيت جارك يحترق وانصحهم انهم يجيبوا الإسعاف معاهم لأنه الظاهر في حالات اختناق.
15- دور على أكبر طماع في البلد وقول له انه معاك خريطة للكنز، وانه الكنز تحت بيت جارك.
16- روح للجريدة ومعاك صورة جارك وخليهم ينزلوا اعلان عن رجل مختل عقلياً هرب من المصحة وخليهم ينزلوا صورة جارك جنب المقال.
17- اشوي كباب عند باب العمارة، وبعد ما يشم الريحة كل جيرانك، خذ الشوي لعند جارك وقله :: تاكل كباب، إذا قالك :: أيوه، قله:: السوق مليان كباب ،،، والله .
18- في نص الليل، وبعد ما ينام كل جيرانك، قف في منتصف الحي وأصرخ :: حريقه، حرييييقه،،،، طبعاً كل جيرانك راح يصحوا مخلوعين وخايفين لتكون الحريقه في بيتهم.
19- ربي في سطح بيتكم 4 أو 5 خلايا نحل، وجيب عصايه وانكش خلايا النحل واتخبا في بيتك، طبعا سكر كل النوافذ،واستمع إلى اصوات جيرانك وهم يتلسوعون.
20- اذا جارك ما زال عايش، غيب عن الحي ثلاث أيام أو أربعة طبعا جارك راح يفرح فرح غير عادي، وأول ما تشوفه في عز فرحته، روح دق عليه الباب وقله، معليش الماء عندنا مقطوع ممكن تمدولنا بربيش مويه (خرطوم ماء) .
قال النبى صلى الله عليه وسلم: (لايدخل الجنة من لا يأمن جاره بوائقه) رواه مسلم .
والبوائق: الغوائل والشرور .
وفى لفظ فى الصحيحين: قال رسول الله صلى الله عليه وسلم: ( والله لايؤمن والله لايؤمن والله لايؤمن ).
قيل من: يارسول الله ؟
قال: ( من لايأمن جاره بوائقه).