واش راكم بنات اللمة؟؟
نتمنى تكونوا كامل بخير إن شاء الله
امممم جبتلكم اليوما طريقتي في تحضير
لمحـــــــاجــــــب
وزادت طلبت الوصفة الأخت الغالية لينا عبد الواحد الي شجعتني باش نحطهالكم وتمدولي رايكم فيها
بالنسبة للمقادير
العجينة:
كيلو ديال سميد رقيق
شوية ملح
وماء دافي للعجن
لعجينا لازم تكون طرية بزاف وتكون تاني مدلوكة مليــــح مليـــــح خليها تريح ممبعدا ارجعي تاني اطلقيها بالما وزيدي ادلكي حتى تولي رطبة وجربي بشوية عجينة حليها مليح وشوفي ادا تتقطعلك زيدي دلكيها وادا كانت سهلة فالإستعمال يعني راهي واجدة
كيما هادي قد ما دلكتها قالتلي ماماتي قليل ههيههيهههه
بعدما ولات طرية ورطبة مليح قرصتها كويرات ع حساب الحجم الي حباتو
خليت المهمة لأمي الغالية حفظها الله ورعاها
ممبعدا تدهني الpلا بالزيت ورشيهم بشوية زيت باش ممبعدا يبقاولكم هاكداك ملاح
ممبعدا غطيهم ببلاستيك وخليهم يريحووا
ودوكا نجيو للخدمة الصحانية 
المهم بالنسبة للحشو كيما نعرفو كل واحد وكيفاش يحشيهم
انا حبيت نتفنن شويااااا ونزيد اضافات خاصة انو خويا ربي يحفظو مرة داق لمحاجب برى خادمينهم بالفروماج وعجبوووه بزااف
أنا الحشوة ديالي درت
3 حبات بصل
2 حبات طماطم كبار
2 مغارف كبار معجون طماطم
قطعة ماجي
زعيترة
وشويا ديال بابريكا حلوة
زيتون اخضر مقطع
دجاج فتتو وقليتو مع شوياثوم وبصل
وفروماااج
ممبعدا حليت هاديك الكويرة مليح وفالوسط خليتها شويا خشينة وحطيت الحشوة ديالي
كيما هاكدا
ممبعد نطويها بهاد الطريقة
نكونو مسخنين الطاوة ولا اي حاجة انتي تطيبي فيها لمحاجب والمسمن
تحطيهم ع الجيهة الي غلقتي بيهاااا وترشيها بالزيت وتخليها تطيب في راحتهااا
ولازم النار تكون متوسطة باش يطيبوا في عقلهم ويجي اللون ديالهم دهبي
ويجووووووك كيما لمحاجب ديالي 
واااااااااش رايكم؟
خرجولك فور يعطيك الصحة
ربى يبارك
بارك الله فيك يالحبيبة هايلين يعطيك صحة نتي وماماك
|
بالصحة والهنا عليك
نورتي موضوعي يا غاليتي
|
يبارك فيك
اسعدني تواجدك في موضوعي
|
نورتي موضوعي غاليتي
ربي يخليك
اسعدني تواجدك في موضوعي
هادو محاجب عصرييين تع الجاج والفورماج يتكسلو علينا هههههههه
|
هههههههه والله غير عندك الصاح
دوكا ولات كل حاجة بالتكسال ولا تقعد هههههه
نورتي موضوعي غاليتي
شكرا لتواجدك العطر
|
بارك الله فيك يالحبيبة حبيت نضحك معاك برك
ربي يحفضك