كرواصون بطريقة مختلفة في التوريق من مطبخــــي 2024.

هاد الوصفة سبيسيال الي يعجزو باش يعملو طريقة التوريق المعروفة
جبتلكم طريقة توريق سهلة والنتيجة مرضية
ماهيش 100/100 كيما الي يتباع
لكن رايحة تعجبكم ان شاء الله لانها جي مورقة وخفيفة

المقادير
500غ فرينة
125 حليب
125 لبن
ملعقة صغيرة ملح

30غ زبدة
بيضة
ملعقة كبيرة ونصف خميرة خبز
2 ملعقة سكر
للتوريق
تقريبا 150غ زبدة خاصة بالتوريق انا استعملت صالحة

خلطي جميع مقادير وعجني لعجينة مليح ثم خليها تخمر
كي تخمر اقسميها على 8 كرات متساوية
حليهم كامل دوائر قطرها 20 سم او حلي بالوحدة كيما تحبي
حلي الاولى وديريلها الزبدة كيما فالصورة ثم حطي عليها الدائرة الثانية وديري عليها الزبدة وهكدا حتى توصلي للدائرة الثامنة هاديك ماتدهنيهاش بالزبدة
الان حلي غير بلاعقل حتى تتحصلي على دائرة كبيرة قطرها حوالي 60 سم
ثم قسميها الى 4 اجزاء وكل جزء نقسمو على 4 هكدا تتحصلي على 16 كرواصون
وتلفيها كيما الكرواصون ..تحطيها في بلاطو وتخليها تخمر ثم ادهنيها بخليط متكون من البيض والخل والحليب والى الفرن يكون مسخن مسبقا 180درجة
والصور توضح جميع المراحل الي ذكرتها

ان شاء جربوه و يعجبكم