درت اليوم القلب اللوز بعد ما سمعت الوصفة من عند السيدة صليحة لي تقدم في اذاعتنا اذاعة عين الدفلى
المهم راح نقلكم المقادير ولي هوما
10 كيسات تاع شاي سميد خشن
7 كيسان تاع شاي سكر
3 كيسان تاع شاي ماء الزهر
الشاربات:رطل سكر مع لتر ماء
طريقة التحضير:
خلطي مليح السكر والسميد بعد ما تخطليهم ديري كاس ماء الزهر وبداي تخلطي مليح حتى يولي يذوب السكر ومبعد زيدي الكاس الثاني تاع ماء الزهر وخلطي مليح حتى يشرب ماه ومبعد الكاس الثالث ونزيد نخلط مليح
ومبعد ندهنو السنيوة بالزيت ونحطو فيها الخليط وندهنو الخليط بالسمن بعد ما نكونو قسمناه
من قبل لازم يكون الفرن تاع غاز ولا تريسينتي مسخن مليح في درجة 180 درجة
وخليه يطيب في غرضو كي يحمار نخرجوه ونديرولو شاربات تكون دافية
ومبعد غمدي سنيوة القلب اللوز بسنيوة اكبر منها ورجعيها في الفرن حتى يبرد هداك الفرن
ومبعد خلوه يشرب هداك الشاربات وقدموه وبالصحة والهنا
انا راني جربتو وذقت منو شوي مسقاطة الله غالب ههههه
والله جا في بنة هايل ويعطيها الصحة لي وراتهونا
اقتصادي ومهوش مكلف
ملاحظة:انتي حرة في الحشو حبيتي ديري ولا لالا
انا قلت مرة الاولى نجربو ادا خرجلي مليح ندير المرة الجاية وادا لالا منديرش
نخلوه يبات باش ينتفخ ويشرب هديك الشاربات
غدوة ان شاء لله نوافيكم بالصور
بارك الله فيكم
بارك الله فيك
في انتظار الصور
في انتظار الصور
شكرا جزيلا جزاك الله كل خير
مشكووووووووووووورةاختي على الوصفة
مشكورة أختي وريدة على الوصفة الرائعة
شكرا حبيبتي على الوصفة