أهلا باللماويات
حلاتلي هاد ليامات الكوزينة
قلت نلعبها حرة لحراير خخخخخخخخ
المهم بعد المنافسة الشيقة اللي دارتها الأخت سوسو
وبعد الأرز الجميل لطاطا حدة
قاتلي ماما باباك او سخف على لبراج وانا مريضة ومانيش قادرة عليه يدي الوقت
قلتلها هات ندير أنا
وزادت صادفت مع الجمعة ويكاند هكاك بعد خخخخخخخخخخخ
حبيت نشارككم براجنا القسنطيني
فالحقيقة ما صورتش كل المراحل خاطر يديا كانو ملعبزين وخويا يوصي على لاباغاي تاعو ويعاود
امع اللول تكاكيت ومبعد وليت كل مرة نصور بيها نهزها بسرفيتة تع الكارط خخخخخخخخخخخ
عذاب
بسم الله
بون المقادير والطريقة مع بعض
كيلة سمن ذائب بـ 3 كيلات دقيق
تغربلي الدقيق ممبعد تصبي عليه السمن الذايب (انا استعملت المرجان هااايل)
وشوية فرينة (باش ما يطلقش الدهن بزاف)
تحاولي تدخلي السمن مليح فالدقيق بيديك
ممبعد تلميه بجنب وتحطي شزية ملح وتصبي الماء الدافي عليه وشوية ماء زهر
كي يذوب هداك الملح فالماء تخلطي الدقيق المبسس
وتبقاي تزيدي فالماء حتى تحسيه تلم
تغطيه وتروحي للغرس
انا الغرس جاني يابس طريتو بشوية ماء (لأنو يشرب)
كي طرا درتلو ماء زهر ، قرفة، قرنفل ، وجلجلانية محمصة
عجنتو وحطيتو بجيهة
قسمت العجينة تاعي على 2
ممبعد على طاولة العمل طرحت العجينة الأولى
مي قبل ما نطرحها حطيت تحتها شوية دقيق مخلط بالسمن يكون شوية شايح وممبعد نزيد نحطو ملفوق
طرحت الغرس على البلاستيك
وممبعد قلبتو على هديك العجينة
ثم حطيت العجينة الثانية
وطرحتهم مليح باش متجيش بزاف خشينة
ممبعد قطعتو بهاد الطريقة
عدلتو الحواف وحطيتو يطيب فالطاجين
السر تع البراج باش ما يجيش مفتفت ما تقلبيهش بزاف
خليه كي تشوفيه بدا يصفار ملفوق قلبيه
ممبعد كي تنحيه خليه يبرد واميحيه بقطعة قماش باش يتنحالو الفتات
وقدميه
احنا عادة ناكلوه باللبن يجي ما يتشبعش
نتمنى تكونو حبيتو البراج تاعنا
شكرا
في أمان الله
خرجلك هآيل يعطيك الصحة.
بصحتكم
الله يشفي والدتك ويعطيها الصحة غاليتي
وصفة جميلة وتصوير ولا أروع بارك الله فيكِ
ويعطيك الصحة يا الغالية
دمتِ مميزة اختي الطيبه
حبيت نسقسيك راني شفت كامل ناس الشرق يقولو نعملو لبراج في الربيع
واش علاقة الربيع بالبراج
والله تالمو هدرتو عليهم شهيتوني نديرهم وما زال مخرجتش باش نشري الغرس (هاد الصوالح نحب نشريهم وحدي راكي عارفة الراجل ما يجيبلكش كما تحبي )
يعطيك الصحة والله راه يشهي
مؤخرا كليت كرطونة جاتني من الشرق و مشبعتش نموت عليه سخفتيني فيه
يعطيك الصحة فحلة ونص
بصحتكم
يعطيك الصحة و بصحتكم يعطيك الصحة مينا براج وعليها الكلام
بدون فوخان وزوخان ههه احلى براج براج ناس الشرق
تسلم الايادي
ام زادو جاو ضياف هههههههههه
معليهش المرة هادي لبراج يكفي
|
انا مش برك نموت عليهم ، ياو نفنى
نتعشى ونتغدى ونستقهوى ومنشبعش منو 
مرسي حبيبتي على التواجد الجميل
|
أهلين سكون الفجر
شكرا لك ربي يجازيك
ألف حية لك يا غالية 
|
اهلا ام منير
عادة يا أم منير
ملي نضنا وحلينا عينينا لقينا امهاتنا كي يدخل الربيع يديرو لبراج
وحد لومبيونص ، والريحة تنتشر فالأرجاء والجيران يبعتو لبعضاهم
رووووووووووووعة
ديريه وما تندميش حبيبة
والغرس ننصحك ما تشريش تع الحوانت ، اشري تع البطانة اللي تلاي فيه العلف تع التمر ونقيه وارحيه فالرحاية تع اللحم
يجي fraiche ومع الدوا يعني الجلجلان والقرفة والقرنفل والزهر يخرجلك برااااج يممممممممممممممممممممم رايع
ألف شكر ام منير ، مرورك اسعدني