عاداتنا في عيد الاضحى 2024.

نطلب من كل واحد يحكي واش يدير في اول ايام عيد الاضحى المبارك
لان كل منطقة في الجزائر و عندها عاداتها و تقاليدها

نتمنى الموضوع يعجبكم

انا قبل العيد بايام نشري للدار و للكوزينة حوايج حتى ولو حاجات رمزية فال كيما يقولو مبعد نزيد نكسي روحي و بنتي و راجلي هههه هو ماعندو قصة في هاذو لحوايج يقولي كي تلبسو نتوما فيها بركة بصح انا نشريلو معانا وندير القاطو تاع العيد انا هنا معنديش فرق بين العيد الكبير و العيد الصغير مانيش من رواد المقولة اللي تقول هاذا العيد نتاع لحم ماشي تاع قاطو كن ماتكونش السينية تاع القهوة متولة و منوعة بالحلويات ما نحسوش عيد و في ليلة العيد نجيبو الكبش تعشي انريس تفرح بيه و انا نوجد لحميس و خبز الدارللغدا نتاع غدوا و في اليل نتلمو في 3 و هاذا العام عدنا في 4 ونديرو الحنة بصح هنا كاين مشكل انريس تموت على الحنة ولازم كي نديرهالها نغنيلها الحنة لحنيييينة و باباها راهو يعاود من ورايا تقلنا زعمة انا عروسة كن تشوفونا تشبعو ضحكبلا ماننساو الكبش هو ثاني يحني
ونهار العيد نوض انا الاولة نغافر مع ماما و بابا على 4تاع الصباح باه ما يسبقني حتى واحد نوجد السينية تاع القهوة نتقهواو علابالي بلي في السنة نفطرو بلحم الكبش بصح حنا هكذا والفنا بعد الصلات و الذبيحةنوجد السلاطة و نحط لقلاية في الكوكوطة تطيب انا نديرها بالرية و القلب و الكبدة نديره في لي برشات و نديرها شوا كيما نتاع برا و كي يوجد لغدا يكونو جاو عجوزتي و شيخي اناديما نعرضهم يتغداو عندي و لعشيا نروحو نغافرو تاع دارنا بيت بابا و نزيد نروح لبيت شيخي (انا اللي نقطعلهم الكبش) علمتني ماما باه يديرو بيه البربوشة (الطعام) في اليوم 2 تاع العيد هنا السطايفية كامل يديرو بربوشة في اليوم 2 تاع العيد و صح عيدكم

يعطيك الصحة انريس
وانا تقريبا ندير كيفك الا دعوة الحنة عندي وليدي لكبير يكرها وكره خاوتو فيها حتى اشواق اللي طفلة واحدة وما تحطهاش
وانا كي يشوفني دايرتها يبطل الماكلا في الدار ويشيطني هاتي نتغدى وهاتي نتعشى برا لذا الحنة نحنيها في الشتاء وغير رجليا
راني نلبس الجوارب ما يفيقش بيها
والباقي كيفكم الانو هنا في داري انا والحاج ذرك من اول ذو الحجة وحنا صايمين حتى نهار العيد نفطرو بكبدة الخروف تكون جوايه الساعة 10 او10 والنصف
والبقية نهار العيد نكرهو نتعب بزاف وانا وحدي كل شيء يروح لراسي
انوض الصباح انوض الاولاد والحاج هوما يغسلو وانا نروح نقفض بلايسهم نعدلهم برك لانهم سيبار بوزي نكون الصالون عدلتو في الليل ووجدت سنيوة القهوة وغلقتو
ومن بعد نفطرهم يلبسو قشهم ويروحو ميدو وانيس مع باباهم للمسجد ونبقا انا واشواق هي تحكي على الكبش وانا نكمل الشغل ونغسل السلاطة للغداء ونطيب قهوة للجزار يجي يذبحلنا وتبدا الكونتاكت بيني انا واخواتي نغفرله كامل
ومن بعد الذبيحة نخدم الدماغ او البوزلوف هو الاول انا نكملو هوما يجيبو الدوارة
نكمل نغسلها ونقيها ومن بعد يلحقو الجزرة انحيلها لفاد نقلي الكبدة ثما نفطرو انا والحاج والاولاطبعا مثل الملح دايما حاضرين بنة العيد بالاولاد
ونكمل الغداء ونرجع نغسل لماعن ونسيق تكون لحق وقت صلاة الضهر نصلي ونروبوزي شويا ونروح لعجوزتي وشيخي نغفرلهم
ونرجعو للدار نكمل نقسم الجزرة انا ثاني جزارة نعرف نقسمها
ندير طراف ملاح نلوحهم ثاني ايام العيد نديرو بربوشة كيما تاع السطايفية بالتما لاني من اصول سطايفية نطبخها بالطماطم وما نكثرش وفي الاخير نضيفلها لحليب وتكون بالحمص ولجريوات والفلفل الاخضر الحار واللحم يكون بزاف وجديد راني ريقي يجري تمنيت العيد غدوا باه ناكلها هههههه
ونكون عرضت دور الرجال لانو نلوح الكتف الايمن راجلي وشيخي و2 سلافي واخي طبعا واولادي انيس وميدو
وجارنا كبير دايما ثاني نحضرو المسكين بدون اهل
وهكاك يروح نص نهار يجي دوري نلبس حجابي ونخرج بعدما انقيالكوزينة ونزيد نوجد سينية قهوة لمن ياتي
لانو زوجي كي نخرج انا يجيوه صحابو
وانا مثلك لازم ندير القاطوات راني نردد بلي عيد اللحم لكن القاطوات ندير
وفي المساء نكون درت على الاهل والاقارب والجيران وكل واحد عندو فنجان قهوة نروح مع المغرب ديخانة نريح وتكون عندي البربوشة تاع لغدا هاذ الليلة تاع الحاج والاولاد
يكونو وجدو مطارق اللحم وشعلو لفحم في التراس الفوق وكي يناديولي نحط صحن بربوشة والسلاطة والديسار والقازوز ونطلع بيهم يكونو وجدو الشواء نتعشاو ونسهرو وننزلو وربي يوصلو وحنا بخير وعافية

للاسف انا نجوزو في لابريقاد الله غالب عندي وشحال معيدتش في الدار نشري الكبش و منحضرش هههه

والله يا سماح غير عدت نشتيك غير من مشاركاتك و راكي فكرتيني في حوايج نسيت ما هدرتش عليهم كيما الصيام والله غير يعطيك الصح انا و راجلي نصومو غير عارفة و ساعات يوم قبل بصح هاذا العام نويت نصوم العشرة بربي نشالله و مهدرتش تاني على الكرشة و الراس حنا عندنا عادة نصبحو نتسابقو على الراس و الكرشة شكون يخدمهم الاول و شكون الفحلة الاولى اللي تخرج من دارها ريحة الشياط نتاع الراس بصح انا والله ما نكذب عليكم وليت انا الاخيرة اللي تخدم الراس و الكرشة على خاطر بيت شيخي يجيو يتغداو عندي لازم نوجد الغدا هو الاول و ثاني راجلي يكره الراس و الكرشة (هو يقلي طيشيهم ولا صدقيهم) بصح انا منحسوش عيد كن منخدمهمش كل عام نخدمهم و نصدقهم و بالنسبة للجلد انا بابا اللي يذبحلي نقلو ماتثقبوليش نغلقو مليح من الرقبة و الرجلين الاماميين نغلي الماء مليح و نصبو فيه جهة الصوف تكون من برا والجلد من داخل الماء نصبوه على الجلد ماشي الصوف بعدساعة نحيو الصوف نتاعنا بكل سهولة انا هاذي الخدمة نخدمها بين الساعة 1 حتى 3 ومنها نتحمم تحميمة خفيفة نلبس قشي الجديد و نروح لدارنا
حنا ثاني الكتف الايمن ناكلوه و الايسر نصدقوه هذي تقدري تقولي عادة عند السطايفية كامل بالنسبة لليوم الثاني انا نروح لبيت شيخي نتغدا عندهم
بالنسبة للدرك الوطني و الله غير يا حليل ربي يجازيكم وكون معاكم نتوما وكل الاجهزة اللي مايقدروش يعقبو العيد في ديارهم ماشي ساهلة ربي يكون في العون

يحبك ربي والنبي حنونة انريس
فكرة الجلد تاعك مليحة لكن خرفان هاد الوقت متكونش فيهم الصوف بزاف انا نتصدقوبيه معلبليش عندنا بلاصة كامل الفيلاج يحطو ثما الجلود ومعلباليش شكون يجي يديهم من بعد
لكن انا قالولي صوف الجلود والا تاع العيد راهي ادير الغروشة يعني هديك الحشرة الرقيقة اللي كل شيء تاكلو منعرف اذا صحيحة والا كذبة برك انا مجربتهاش
واحنا في دارنا كانت امي الله يرحمها نوقحوه على الطابونة ونسلو الصوف من فوق
يعني الجلد هو اللي يجي جيهة النار مدة 10 دقايق نخلصوه وتتغسل صوفو في هذاك النهار
اما جماعة الدرك الوطني نقولهم الله يكون في العون وربي يحميكم للوطن لانو احنا بامان بفضلكم
وتعيدو وتزيدو وينعاد عليكم بالصحة والهناء يا رب
انريس اسم بنتك عجبني
هل له معنى وقوليلي معناه

لي عودة باذن الله الموضوع رائع

ربي يرحم امك و يوسع عليها و يجعل مثواها الجنة امييين و الفكرة نتاعك تاع الجلد ثاني مليحة انا منحبش اللي يخليو الجلد حتى ينتن و باه يخدموه بلاك عليها تجي الغروشة انا الصوف نتاعي تاع العيد الي فات غسلتها في عشوتها و مديتها لماما قتلها زيديها لاختي المخطوبة و مازالها ماصرالها والو سيرتو كي تحطي معاها الكافور هذوك الدوائراللي نديروهم في الصوف

سلام عليكم ورحمة الله وبركاته وعيد مبارك سعيد للجميع
والان نحكيو على العيد عندنا في قسنطية ولو انا كل عائلة عندها عاداتها نحكيو على عائلتي اول شئ الاضحية نشريوها قبل بايام ننفضو الدار نصنعو الحلوى لي هي لمقرقشات ولكروكي والمقروض ونكسيو لولاد الصغار نهار عشية العيد نديرو التريدة تاع الطاجين لي تسمى لفطير ولى لمسمن في بعض الولايات باه نديروها نهار العيد للغداء نهار العيد الصباح نوضو بكري من الرقاد نفرزو الدار ونوجدو سينية القهوة بعدما يكملو الصلاة الرجال يذبحو برى ويبعتو الراس والدوارة تاع الاضحية نغسلوهم ونشوطو الراس ونتسابقو احنا الجيران شكون تكمل قبل وطبعا زيارة المقابر وبعد تبادل الزيارات بين الاهل احنا في دارنا نتغداو بالراس والتريدة تاع الطاجين الشواء حتى للمساء نتعشاو بيه وغدوا يعني تاني عيد نديرو بربوشة للغداء بالكتف الايمن وقطع من اللحم وقبل مانتغداو لازم نخرجو صحن كبير برى صدقة صدقوني راني نحكيلكم على عادات مانعرف مازالت ولا راحت انا عندي 12 سنة ماعيدتش فالجزائر وعيدكم مبارك واعاده الله علينا وعليكم بالخير ان شاء الله

السلام عليكم ورحمة الله تعالى وبركاته

احنا نهار العيد اصباح نصبحو مع التسياق والتفراز والفراش راكي تعرفي ومن بعد كي يبداو يذبحو نعاونوهم كي يسلخو يعني راكي تعرفي جيب هاذيك جيبي هاذيك من بعد غير ينحوي الراس والكرعين تروح وحدة تشوطهم وتنقيهم ومن بعد ينحيو الكرشة والمسارن واكيد هوما ثاني شونطي كبير ،، بعد مانكملو الشغل هذا ،،، نقليو الكبدة نتغداو بيها ومن بعد نعاودو نوليو للراس يجي خويا ولا باب يقسمو نغسلوه امليح ونديروه يطيب وهذاك هو العشا لي ناكلوه ياما نديروه في الفور ولا ناكلوه هكذاك

في اليوم الثاني ، انوضو مع الصباح لماعن تاع القهوة مزالو والشياط تاع القليان والشواء ،، نلقاو بابا لعزيز موجدلنا كل شيء نشوو وناكلو على 9 هكذاك ومن بعد تبدا حملة العصبانة نبدا انا وماما نديروها وديمة توجد في الوقت على 12 تلقاي كامل الرجال تاع لافامي في دارنا يتغداو ،، وفي االعشاء نقليو ولا نكملو العصبانة وساعات نديرو حاجة خلاف وساعات مانتعشاوش باسك نكونو شبعنا في النهار

يعطيك الصحة على موضوعك ،، وعيدك مبارك