قطع لحم + قطع دجاج
حمص منقوع
2 حبات طماطم مفرومة
4 فصوص ثوم
حبة بص مفرومة
م ك ونص طماطم مصبرة
فلفل اخضر حار
ملح + فلفل اكحل + فلفل احمر حار + راس الحانوت
زبدة + زيت
للتزيين
بيض مغلي
فلفل اخضر حلو مقلي ومقشر
الطريقة
في طنجرة نضع شوية زيت و البصلة المفرومة + الثوم المهروس + قطع اللحم والدجاج + ملح ونقليهم مليح
ومن بعد نضيف باقي التوابل + الطماطم المفرومة والحمص المنقوع ونقليها لمدة 5 دقائق
ونمرق بماء دافيء
بعد نصف ساعة ننزع الدجاج من المرق ونحطو يتحمر في صينية الفرن
ونضيف الى المرق الطماطم المصبرة المحلولة في كمية من الماء ونتركها على النار الى ان يستوي اللحم وفي الاخير نضيفلها حبات فلفل اخضر حار ونطفي عليها
ونلاحظ ان كمية المرق تناقصت واصبحت خاثرة نوعا ما
وهذا شكلها
نصفي اللحم والحمص والفلفل من المرقة ونتركهم للتزيين في اخر خطور
الخطوة الثانية
نفرغ الشخشوخة في جفنة
نملأها بالماء ومن بعد نصفيها في الكسكاس ونخليها تقطر مليح
ومن بعد نرجعها للجفنة ونضيفلها كمية من الزيت وندخل الزيت بالاصابع بين حبات الشخشوخة
نحطها تفور للمرة الاولى ونحرك من حين لاخر بالشوكة
بعد ما تفور لمدة 10 دقائق نرجعها للجفنة ونخليها تبرد قليلا
ومن بعد نرش عليها حوالي نصف كاس من الماء ونخليها تتشربو
ومن بعد نضيفلها شوية زيت ونفركها بالاصابع ونحطها تفور للمرة الثانية ولمدة 10 دقائق ايضا
ونرجعها للجفنة ونبللها بكمية قليلة من الزيت ونحطها تفور للمرة الثالثة والاخيرة
بعدما تفور نخليها تبرد وتكون جهزت
الخطوة الثالثة
نسخن المرق وبمجرد ما يسخن نضيف الشخشوخة + م ص زبدة ونتركها لمدة دقيقتين ومن بعد نطفي عليها
ونقدمها مع قطع الدجاج المحمر و البيض والفلفل الحلو
سخفتيني فيها يعطيك الصحة جاتك هايلة
ربي يحفطلك ندوش زينونة
والله جاتك هايلة
بصحتكم وصح فطورك
:heh:
دبصح قوليلي هذشك الشخشوخة تصنعوها ولا تشروها
فهميني فيها مليح
|
الله يسلمك دارين
شكراا على المرور ورمضان كريم
|
الله يسلمك
مشكورة يا دعاء
|
الله يسلمك بسومة
مرورك الهايل يا غالية وصحا فطورك
|
|
وفيك يبارك ورمضان كريم
|
الله يسلمك فوفة
كاين الجاهزة وكاين اللي يخدمها في الدار
راني جبتلك الطريقة من موقع اخر
اقتباس:
* كيفية تحضير رقائق «الشخشوخة»
مقادير العجينة:
دقيق يكون رطب يعني فيه دقاق مليح
ملح
ماء
* تعجن العجينة المحضرة من الدقيق جيدا، تعجني وتسقي لعجينة في نفس الوقت
على حسب نوع «الشخشوخة»،
عجينة شخشوخة الظفر تكون شوي يابسة ممكن نحلوها بالحلال عجينة الشواط تكون كيما عجينة لمحاجب في الليونة تاعها نحلوها باليد باستعمال الزيت
ثم تشكل منها كريات صغيرة،
وتتركيها ترتاح مدة ربع ساعة ومن هذه الكريات يتم صنع شرائح دائرية متساوية، وتطيبيها على طاجين نتاع لحديد
شخشوخة الطفر طيبيها كل واحدة وحدها
وذلك لبضع دقائق فقط وعدم تركها تستوي. بعد الانتهاء من طهي الرقائق، يتم تفتيتها إلى قطع صغيرة جدا بالنسبة «لشخشوخة الظفر»، . وتترك شخشوخة الظفر لأيام عديدة لتجف؛ لأن طعمها سيكون ألذ
|
الله يسلمك دهبية
بارك الله فيك
|
اهلا بيك يا كوثر ورمضان كريم يا غالية