مساء الانوار عليكم
صحا فطوركم وربي يتقبل منكم
ان شاء الله تكونوا بخير وبصحة جيدة
اولا الحمد لله على عودة لمتنا الغالية وربي يدوم لمتنا فيها
جبتلكم تشوفو لقاطو تاعنا تاع العيد
تقريبا راني درته انا وحدي احم احم نشكر في روحي
يما دارت المقروض برك
هاهم لي فوطو و نتمنى تعطوني رايكم
نبدآوا بالمقروض سيد الحلويآت اكيد
بصح مزال مشهرنآهش يعني خاصه لعسل برك
[IMG][/IMG]
دزيريـــآت
صآبلي
قآطو بالشيكولا و القوفريـــط
لعرآيـــش
حلوة باللوز وحلوة الترك ( بدون طهي )
صآبلي الوردة
العآم هذا مدرنآش البقلآوة الله غالب
انا مرضت ويما غير كيما جات من السفر دارت غير
المقروض برك وماقدرتش
والله حنونة باينة عليكـ شااآآطرة لوكان تعطيني برك وصفة حلوة باللوز وحلوة التركـ
ايا صح عيدكـ حنوووونة وصحيتي على الموضوع الشباآآب
بصحتكم و طيريلي صحن معآكــمـ ههههـ
بالصحة ~
الله يبارك
و الله غير راكي قافزة يا سامية خيتي
و يا على دوك الدزيريات كي جاوك شابين…الله يبارك
يعطيك الصحة لحبيبة
سيبيلي حقي من ديك تاع حلوة الترك اني نموت عليها…انا اللي درتها ماتطيبش مابغاتش تتماسك الوغ درتلها لعسل و لكونفيتيغ راحتلها قاع البنة تاع حلوة الترك خسارة…املي حلي عينك تنسايلي حقي…ولا مانخليلكش حقك من كحلوش و قلبو ابيض…هيهيهيهي
و الله يعطيك الصحة سامية خيتي على دوك اليدين
ربي يباركلك فيهم
….
تعيدوا بالصحة ان شاء الله حنونة
الله يبارك
قاطوات وعليهم لكلام
يممممممممممممممممم
يعطيك الصحة
راني نحوس على قاطوات ميطيبوش بعد ولقيت عندك هادو وباينين بنان
مالا الحقيني بلاروسات 
السلام عليكم
شابين
مي ناكل زوج انواعهم كالعادة
تحياتي
|
وعليكم السلام
يبارك فيك حنونة وراني لاحقاتك
من عيوني حنونة نمدلك الوصفة
انا درت رطل لوز + رطل كاوكاو + وعلبة نيستلي
وماء زهر + حلوة الترك + اذا حبيتي تزيدي قاطو بيمو
ولا اي قاطو موجود عندك في البيت + انا استعملت 2 علب شيكولا
برشتهم معاها
في الاخير شيكولا سوداء او بيضاء باه نغمس فيها
الطريقة : ترحيهم الكل طبعا كل واحد على حدا ومن بعد تخلطيهم مع
بعضاهم وتزيدلو شوي ماء الزهر ( ماتشمخيهش بالماء الزهر بزاف )
ومن بعد شديهم بالنستلي
حتى تتحصلي على عجينة تقدري تلميها وتشكليها كويرات
خليها تقعد شوي برك ومن بعد دوبي الشيكولا في حمام مائي
كي تشوفيها دابت غمسلي دوك الكويرات تاعك
وزينيها من لفوق كيما تحبي انا درت بالنواد كوكو وانتي كيما تحبي
نتمنى انها تعجبك وربي يوفقك حنونة
|
السلام عليكم
من عينيا ختي تفضلي لا غوسات
المقادير ( انا كيلت الفرينة بعلبة زبدة تاع 500 غ )
-الفرينة درت زوج كيلات
-زبدة او مارغارين اقل من علبة
كاس ونص سكر
4 صفار البيض
2 خميرة القاطو + ا فانيلا
نحتاجو علبة قوفريط + الشكولا باه نلصق بيها الحبات
( انا هنا استعملت الشيكولا وانتي كيما تحبي تقدري تستعملي مربى )
الشاربآت :
تكون ثقيلة شوية ماشي خفيفة
2 مغارف اكل كاكاو
كيفية التحضير :
اخلطي جيدا المقادير السابقة زبدة و السكر و صفار البيض
وضيفي الفانيليا و الخميرة الكيمائية من بعد اجمعي الكل بالفرينة
لتتحصلي على عجينة متماسكة
شكلي صبيعات بالعجينة وحطيهم في صينية ودخليهم
للفرن من 15 د الى 20 د كي طيب خليها تبرد شوي من بعد لصقيها
مثنى مثنى بالشيكولا دايبة
خلطي الشاربات مع الكاكاو واغطسي الحلوى في الخليط
قطريها ومن بعد مرمديها في القوفريط المرحي
ملاحظة : انا مشكلتش صبيعات انا طبعت بالطابع مستطيل الشكل
نتمنى تعجبك ان شاء الله
|
ان شاء الله راح نديرو