بما انكم طلبتو مني نحطلكم وصفات الحلويات اللي حطيتهم وهوما بزاف قلت كل يوم نحطلكم وصفة
بحلوى مثلثات بالكريمة بنينة تهبل
اللي يذوقها يقولي على الوصفة العجينة نحتاج :
في كسرونة تحطي 250غ زبدة+ 2 كيسان سكر مش معمرين (ناقصين 2 صباع )+4 مغارف عسل
حطيهم فوق النار حتى يذوبو ومبعدا خليهم يبردو
أخفقيهم وزيديلهم 4 بيضات أو 5 حسب حجم البيض + مفرف بيكاربونات+ 1 خميرة+ فاني ولمي بالفرينة
قسمي العجينة على 5 أفتحيها فوق ظهر بلاطو نتاع كوشة مدهون ومرشوش فرينة وطيبي كل وحدة وحدها غطيهم وخليهم يبردو.
تحضير الكريمة:
باه نحضروها لازمنا سيروو هو عبارة عن كاس ماء +كاس سكر و عصير 2 حبات قارص فوق النار
بالخلاط أخفقي 4 صفار بيض +سيرو سخووووووووووووووون+فاني مغرف كبيرة + و زيدي الزبدة من 300 حتى 400 غ زبدة حتى تتحصلي علاى كريمة خفيفة
ونحتاج علبة معجون مشماش
دركا نجيب بلاطو اللي طيبنا فيه نقلبوه عادي ونحطو فيه واحدة نتاع قاطو و ندهنها بالكونفيتور + قاطو + كريمة +قاطو+كونفيتور+قاطو +كريمةو الطبقة الأخيرة نتاع القاطو نرحيها ورشها من فوق نخليها تبات ومبعدا قسميها مثلثات وديريلها الشوكولا وبريون أو قطعيها معينات
اسمحولي على الصور ناقصة هذا وش لقيت في pc انشاء الله الشرح كان وافي وفهمتوني ماتنساونيش بالدعوات
والتطبيق
fi mizanne hassanateek nchlh
يسلم دياتك وربي يجازيك كل الخير حبوبة
شكرا على الصفة في انتظار الوصفات الاخرى
nchallah nejarebou we nhouto tchoufih
مممم باينتو هشيش يدوب فالفم
ولكن يا حبيبتي دهان ديري فلابات عاود لكريمة ياويلي ياويلي لحب يقلي هاني
قلتي طيبيهم مافهمتش كيفاش طيبيهم من بعد ديري كونفيتوغ ولا حتى ديري وطيبيهم
الخطوة المهم ماكايناش بالصورة معليش حبيبة شرحيلي غير بالكتبة
ويعطيك الصحة والله يعطيك حجة
|
ما تكثريش هزي حبة برك بصح علابالي ماتقدريش تصبري و لوكان ذوقيه تولي كيما حالتي طالعة هابطة عليه
شوفي حبوبة كيما توجدي لعجينة قسميها على 5 ومبعدا أفتحي كل وحدة وحدها فوق ظهر لبلاطو و طيببيها وحدها معناها طيبي 5 كل وحدة وحدها كيما تكملي لبلاطو اللي طيبتي فيه أقلبيه عادي و أبداي حطي طبقة قاطو + طبقة كونفيتور+قاطو+ كريمة+قاطو +كونفيتو+قاطو+ كريمة والقاطو الأخير ارحيهورشيه من فوق انشاء الله تكوني فهمتيني
خرجلك روعة