بعدما انهينا موضوع الفطام اكيد ان كل ام سيتوجه تفكيرها الى كيفية تعليم ابنها الدخول الى الحمام والتخلص من الحفاظات وهذا معناه بداية تدريب الطفل على التبول والتبرز في المرحاض-اعزكم الله –
استخدام التواليت للطفل يعتبر نقطة تحول في حياته ومعيار للحكم فيما اذا كان الطفل يستجيب لمراحل نموه وتطوره بشكل طبيعي ام لا
مع مراعاة الفروق الفردية بين الاطفال
وفي غالب الاحيان تبدا هذه المرحلة في سن 18 شهرا الى غاية 24 شهرا وقد تصل حتى سن 3 سنوات او اكثر كل حسب استعداداته وميوله
وقبل البدء في مرحلة تعليم اطفالنا الذهاب الى المرحاض والاستغناء عن الحفاضات يجب مراعاة عدة عوامل منها:
– سن الطفل
– القدرة على الكلام او الاشارة الى الشيء الذي يريده
– القدرة على المشي
– أن يربط بين قدرته على التحكم وبقاء ملابسه جافة ونظيفة
– الرغبة في تغيير الحفاضة المتسخة
– جفاف الحفاضة
– اخبار الام برغبته في الذهاب الى المرحاض
– عدم الرغبة في ارتداء الحفاضات
– مراعاة الفروق بين الجنسين فالاستعداد عند البنت اسرع منه عند الذكر
– يجب تجهيز القصرية او أو مقعد حمام خاص يمكن وضعه فوق قاعدة التواليت العادية
– شراء الملابس الداخلية
– تحديد اوقات معينة خلال النهار لتعليمه مثلا بعد الاكل والشرب
– اشرحي لطفلك لماذا هذا التغيير
– حاولي تفادي استعمال الحفاض خلال فترات النهار واسأليه بين الحين والاخر اذا ما كان يريد استعمال القصرية
– الامر ليس بالسهل ولا بالهين لذا عليك ان تتعاملي بايجابية مع وضع ابنك والابتعاد عن الاحباط في حالات الفشل او الانتكاس
فالعملية قد تستغرق اسابيع او اشهر
– استخدام المدح والتحفيزات والتدرج في ذلك فاكيد انها ستعزز عند طفلك السلوكات الجيدة
– البلل اليلي يمكن التخلص منه بعد ذلك كأن تنقصي كمية الماء التي يتناولها الصغير مساءا وعوديه على مناداتك اذا ما استيقظ في الليل
كانت هذه بعض الخطوات التي قد تفيدنا في عملية فطام اطفالنا بدون تعب ولا مشاكل
احببنا ان نتشارك التجارب ونستخلص النتائج لتعم الفائدة
فتجربتي قد تفيدكِ
و
تجربتكِ قد تفيدني
فهناك الكثير منا يبحث عن تجربة الاخر ليستفيد
فلا تحرمونا من اكتساب المعرفة
ولا تحرموا أنفسكم الأجر
ضعوا بصمتكم
و شاركونا تجاربكم مع اطفالكم او اخوانكم
ماذا فعلت أنت ؟ و كيف بدأتي ؟
وكيف كانت هذه المرحلة بالنسبة لك ؟ وهل لاقيتى صعوبات كبيرة مع ابنك ؟
وكيف وصلت للنتيجة السليمة ، وهل عانيت من مشاكل من خلال تجربتك ؟
هل كانت تجربة صعبة ؟ أم العكس ؟
تجاربكم تفيدنا ومشاركاتكم تسعدنا
فلا تبخلوا علينا بها
هناك جوائز تنتظر من تشاركنا في أكثر من موضوع
فشاركونا المتعة والفائدة
موضوع باهي كالعادة يعطيك الصحة شوشو << الله لا يحرمنا منك 
بالنسبة لعبودي الصراحة مالقينا صعوبة في تخليه عن الحفاضات
الأيام الاولى ماكان يعرف ويعملها في الليل فقط ولكن في النهار كان يقلنا وناخدوه ^^ حتى إتعود
كل الشكر للمجموعة
بوووساتي لمنصف الأمور ^_^
باه نكونو واضحين من الاول انا راني نسيت شوي وش درت مع انريس بالضبط لانو بديت معاها في سن مبكرة وماكانتش تعرف توصل الميساج المهم قبل عامين كنت قضيت على الحفاضات بصح مازالني متفكرة حوايج
الحاجة الاولى هي انو بديت نلاحظ انو عندها اوقات معينة تتبرز فيهم البول حاشاكم محفضتش وقتو كنت نلقا لاكوش مبلولة وخلاص اما البراز فلاحظت انها عندها اوقات معينة فقط
وعلابلي بلي بديت معاها قبل ما يكون عندها عام عدت نوقت على وقتها اللي تتبرز فيه و نحيلها لا كوش و نحطها فوق البو نتاعها القصرية اعزكم الله و نديرلها صوت معين هي بشويا بشويا فهمت وعادت وحدهاوحدها كي ياحقها وقت البراز و منفيقلهاش انا تبكي
هذي المرحلة راهي لازملها صبر و عسة شديدة انا في هذاك الوقت مكنتش خدامة يعني متفرغتلها طبعا كاين توجيه منعند ماما
ومبعد شويا شويا عدت نحيلها لا كوش في النهار و نعسها و البو نتاعها حاطتهولها في الدوش وهي عادت تروح وحدها ولكن متعرفش تنحي قشها انا كنت نعاونها حتان والفت متبولش في النهار
وجات مرحلة الليل هي الناس كامل يشكيو منها بصح انا والله ملقيت مشكل كنت نديها حشاكم تبول قبل النوم مباشرة منهذيك حتى للصباح
فرحت بزاف كي متعبتنيش في الليل
ولكن ؟؟؟؟؟؟؟؟
المفاجأ’ كانت كي زادت ختها ريناد ولات تبول على روحها يوميا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟
رايحة نهبل وليت نشري لي كوش لهذي و هذيك استمر معاها الحال مدة شهرين تقريبا
جيت هنا للنت و قرعجت و شفت استعملت معاها كل الوساءل
واخر وسيلة كانت حكمتها عطيتها طريح طرييييحة وقلتلها نزيد نلقا البول في فراشك نقتلك ههههه من هذيك الى يومنا هذا
العبارة هذي كن يقراوها القور يعقبوني للشرع هههههه بصح والله منهار ضربتها مازادتش بالت
كانت كلي تديرها بالذمة كلي مكرة فيا كلي انتقام مفهمتش ايكزاكت المهم تديرها وخلاص
ضرك راني الحمد لله ريناد مزلت مبديتش معاها مع اني نعرف و قتها اللي تتبرز فيه لكن مع الخدمة مازال مبديتلهاش بروقرام نقعد برك ونلتا بيها
كشما نزيد نتفكر راني نعاود نحطو المهم لي عودة انشاء الله
ام منصف المرة الجاية ديريلنا موضوع الغيرة بين الاولاد راه مهم جدا وانا عانيت منو بزاااااااف خصوصا وانو انريس مدللة جدا جدا جدا
كي العادة مع المواضيع اللي تهم الامهات وحتى البنات لي مزالو عازبات
وحدة تتعلم في خوها ووحدة في بنت ختها وهي رايحة
نحكيلكم ديما على ماما
مانتذكرش بالضبط العمر لي بدات تتخلص فيه من الحفاضات نظن من عامين الى 3 سنوات
تعمدت تقوم بهاد الشي في فصل الصيف
بحيث ماتلبسلوش حاجة تقيلة،، حاجة خفيفة فرات
اولا طبعا الطفل مايحسش بالراحة كي يكون مبلل دونك هو من روحو يعبر على الانزعاج تاعو ،،
ولما تنحيلو الحفاضة ويكون عاملها تعبر بوجهها على انو هادا شي مش مليح
وكانت كلما تتفقدو تلقى الحفاضة جافة تسفقلو وتضمو وتبوسو هكدا يفهم بلي راه دار حاجة مليحة،،
ونتذكر انو هي كانت تحسبلو المدة لي يبغي يستريح فيها ولقاتها تقريبا كل 3 ساعات
اصبحت كل 3 ساعات تديه للمرحاض او للمقعد هداك وكي يستريح تاني تسفقلو
مع الوقت بدا يفهم وحدو ويروح وحدو
نشكرك بزاف اختي ام منصف على الموضوع القيم والرائع
بالنسبة لابنتي ابتسام في عمرها الان 3سنوات ونصف بالتقريب
في الحقيقة مالقيتش صعوبات لاني مابديتلهاش بكري
كان في عمرها عامين ونصف لما تخلات عن الحفاضات والتاخر كان لسبب الحريق اللي حدث لها
انا كنت بديت نعلم فيها في تمام العامين في هذاك الوقت لقيت بعض الصعوبات ككل الاطفال خاصة كنا في فصل الشتاء
ولما صرالها الحادث حبست عليها وخليتها بالحفاضات لبضع اشهر يعني كانت كبيرة تعرف مليح مليح
تعلمت بسهووولة والان راهي الحمد لله لكن في الليل نديرلها مانامنهاش خصوصا في الشتاء
اما ابنتي تسنيم في عمرها عام ونصف ماشكيتش تتعلم بكري لانها اولا مازالت مابداتش تتعلم تهدر والسبب في انها ماتقيمش الشخص لما يكون يتكلم معاها ابدا تفهم وتعرف كلشي ودير روحها ماعلابالهاش خلاص
على هذاك مانظنش تتعلم بسرعة والله اعلم
اولا بديت ببنتي كان عندها عام نحيتلها حفاضة الليل و كنت نفرشلها بلاستيك و فراش خفيف و الحمد لله كانت تبقى شهرين حتى 3 اشهر باش تتبول (اعزكم الله ) مرة في الليل و هكذا حتى كملت عامين بديت نحيتلها حفاضة النهار و الحمد لله ماتعبتنيش
و الولد كي كمل عامين نحيتلو حفاضة الليل والنهار في نفس الوقت و تاني ماتعبتش معاه
و كنت نديهم للمرحاض في وقت واحد
وكيف كانت هذه المرحلة بالنسبة لك ؟ وهل لاقيتى صعوبات كبيرة مع ابنك ؟
فيها شوية صعوبات بصح فيها راحة للاولاد و الام اكثر (لاني مانحبش لولاد كبار و يلبسو حفاضة )
وكيف وصلت للنتيجة السليمة ، وهل عانيت من مشاكل من خلال تجربتك ؟
الحمد لله مالقيتش صعوبات رغم اني كان عندي طفلين يعني التعب مضاعف
هل كانت تجربة صعبة ؟ أم العكس ؟
تجربة ماشي سهلة و في نفس الوقت ماشي صعيبة لكن يلزمها الوقت و الصبر
هاذي هي مشاركتي و ان شاء الله نطبق تجربتي مع الكتكوتة الصغيرة
لي عودة ان شاء الله
المهم انا ماعانيتش بزاف مع وليدي عبد السلام من ناحية الكوش لاخطرش نحيتولو كي كان في عمرو عام, بديت نعلموعلى تسعة اشهر ومشى على 10 اشهر
كنت نحيلو الكوش في النهار ونديه للمرحاض ونقولو دير(بش ااح) ههههههههه
هذي هي العبارة اللي نستعملوها احنا ومن بعد كان يتبول (اعزكم الله) كنت نقلو (واي حبيبي )ونسلم عليه ونعنقو وفي الليل نديه قبل مايرقد ونوضو فالليل 2 مرات بالشوية حتى والف ينوض وحدو وضوك كبر وراني مع اخوه اكرم عندو 9 اشهر بديت معاه كي كان عندو 6 اشهر نديه مرة على مرة للحمام ونقولو دير بش ااح و يديرها عادي وراني مزلت معاه وان شاء الله ربي يوفقني في تربيتهم ويوفق كل الامهات
آآآآآآآآآآآآآآآآآآمييييييييييي ن يارب
اولا نبدا ببنتي لكبيرة ريهام نحيتلها الكوش عامين في عمرها يعني بعد ما فطمتها نحيتلها في النهار وكان الصيف نلبسها غير حاجة خفيفة وفي الليل كنت نديرلها وكانت دائما تصبح جافة يعني ما تبولش بعد 15 يوم ريسكطيت ونحيتلها تاني في الليل والحمد الله جامي دارتها لحد الان راهي 7 ونص في عمرها
ريتاج تاني بديتلها عامين وكنت حبستلها الرضاعة عام ونص تاني في النهار من بعد الليل مكاش مشكل معاها والحمد الله لحد الان
وكيف كانت هذه المرحلة بالنسبة لك ؟ وهل لاقيتى صعوبات كبيرة مع ابنك ؟
الحمد الله مرت مرحلة بدون قلق وسلام ولم اواجه صعوبات كنت نحطلهم القصرية في الدوش جيهم ساهلة يروحو وحدهم وكي يديروها يعيطولي نغسللهم يعني بكل سهولة
وكيف وصلت للنتيجة السليمة ، وهل عانيت من مشاكل من خلال تجربتك ؟
كما سبق وان ذكرت توصلت لنتيجة مرضية بدون صعوبات
هل كانت تجربة صعبة ؟ أم العكس ؟
سهلة للغاية والحمد لله