حباباتنا اللمويات
هانا رجعناكم مع وصفة جديدة و التالية من هذا الاسبوع
بعد هذي الوصفة رح ينتقل مخيمنا ان شاء الله لقسم اخر
رح نبدا درك في الوصفة لجديدة لي جبتلكم و كما لعادة حصرية 100/100
أولا نروحو لبسان ملينا 
ونعرفكم بالنبتة الي رح تكون في كوزينتنا بعد شويا
هذي النبتة حنا نسموها thavovristh و باللغة الفرنسية la fleur vrivras هي تكون غير في هذا الوقت
درك نرجعو
للمقادير :
انوجدو كمية من هذي النبتة يعني بتقريب قد مركو تشوفو في الصورة + كمية من أوراق البصل الأخضر + دقيق + زيت الزيتون + قليل من الملح
طريقة التحضير :
لاحضو معايا الصور أولا لاوراق النبتة و البصل قبل القطع
رح نحكموهم و نقطعوهم صغار جداااا بهذا الشكل
بعدها كي نكملو نبقاو نسكرفجوهم بليدين في زوج حتى يولو بهذا الشكل
بعدها نضيفو الدقيق كما في الصورة
بعدها نخلطوهم جيداا و نضيفو قليل من الملح و الزيت كما الصورة
انا بعدها زدت ثانيك قليل من الزيت لانو لازم يتشمخ بالزيت حتى يرجع بهذا الشكل
بعدها نحكمو مقدار قرصة متوسطة و نديروها بكل دائري و نقطعوها على اربعة و بعدها نقطعوها بهذا الشكل
و في الاخير نديروهم يطيبو كما هك
و هذا هو الشكل النهائي
درك تقولو دار مليــــنا من أكلات الاعشاب
رهي أفضل برااج تقدري تكليهم
و في الاخير صحية جداااا
ولا عندكم هذي النبتة
غير متراطيوش
نتلاقاو في قسم جديد
و نرجعوكم مرة أخرى لهذا القسم ولا عيشنا ربي
دمتم بخير
و السلام عليكم
عاشت الايادي
بارك الله فيك يا نباتية أنتي ^_^
وصفة غير الوصفات فعلا نقولو عليها حصرية 100/100
بالصحة والهنى عليكم حبيبة بالنسبة لهاد النبتة مانعرفهاش ومش عارفة الا كاينة عدنا
عندها هداك لخضار كيما البصلة طويلة نفسي اعرف بنتها
بارك الله فيك ختيتي
لمي لماعن كامل بلاكي تخلي حاجة وراكي لازم نحزمو الامتعة اليوم
غريبة كرة القبايل خخخ
يعطيك الصحة فلة وصفة جديدة ورائعة
ابعثيلنا هاد النبتة دبري راسك
تسلم الأيادي حبيبتي
3jabtini awalen ki raki sghira w diri hwayej ta3 takalid
2emment ki 3arraftina b haja jdida
ana 3n nafssi ma na3rafhach, bassah bayna bnina
yasslamou yaddik ya zine
goulili, louken za3ma nremplassiha b salk, tji?
|
|
رني لميت لماعن و غسلتهم بقا غير تجي و نسهلو ان شاء الله
|
و علبالي رح تعجبك
حنا لقبايل عندنا بزااف حوايج نحاول نقدم الي نقدر عليه
|
مزالنا نحافظو على التقاليد لانها بزاف صحية و طبيعية و من غير هذا كامل بنتها وحدها
عندك تخلطي السلق خخخخ راح تباصينا
نقولك خلطي اوراق البصل مع النعناع و شوفي كيفاه تجيك
وتقدري الزيت الزيتون ولا معندكش بزااف خلطيها مع الزيت الي رنا نشروها معليش المهم فيها ريحة الزيت الزيتون
رح نحاول نجربها و نحطهالكم ثانيك رهو مذاق ميتنساش
مي بلاكي تكليها مع لعدس رهي تتكل مع القهوة ولا لتاي
اييييه نعرفهآ انآ هآد النبتة حنآ عندنآ نقولولهآ بيبرآس
ديجآ آي نآبتة عندنآ من هيه مورآ الدآر خخخ
يعجبني الـgــو تآعهآ ، بكري نشفى على جدتي الله يرحمهآ
فالوقت هدآ كي تنحيهآ يلزمنآ نديرو الكسرة رخسيس ونحطوهآ فوقهآ ونآكلو
يعني بخآسك كمآ تقولي انتمآ تديرو مع الدقيق وتآكلو حنآ نو الكسرة وحدهآ وامبعد تجوزي بيهآ
آآو نفس البنة ديجآ رآهي في فمي يم يم
بصح دركـ ماعدنآش نديروهآ وانتي فكرتيني بيهآ بعد مآمآ اي تطبخ وآقيلآ هي غدآيآ اليوم
يسلمو دوكـ اليدين فلفولــة ، هآآآو طلعنآ نتشآبهو في حوآيج
