صباحكم /مساءكم طيب
ان شالله تكونو بخير حبيباتي بنات المطبخ اللماوي
ليوم عملت بسكويت لكن مالح وجاء خفيف ومقرمش وذوقو هايل
حبيت نفيد الاخوات بيه اكيد رح يحبوه الصغار
المقادير نتاعو ساهلة وبسيطة
2 كيسان ونص فرينة
4 حبات فرماج مثلث
قرصة ملح
نص مغرفة بيكاربونات وتقدري تبدليها بنص كيس خميرة
نص كاس زيت
ونص كاس معدنوس مقطع رقيق
وتعجن بالماء يكون دافئ
طريقة التحضير :
في اناء نحطو الفرينة الملح الخميرة او البكربونات والفرماج
نضيفولو المعدنوس
ونضيفو نص كاس زيت
نخلطو كل شي مع بعضو ونحكو مليح براحةا ليد باه تتداخل المكونات مع بعضها
وبعدها نعجنوها بالماء يكون دافئ حتان نتحصلو على عجينة طرية ونخلوها ترتاح مدة 30 دقيقة
بعد ما ارتاحت نعاودو نخرجو منها النفس ونفتحوها بالحلال
بعد ما نفتحوها نقصوها بالشكل المرغوب فيه انا عملتها دوائر صغار
نشعلو الفرن نتاعنا يكون سخون مسبقا ونحطو البسكويت نتاعنا في بلاطو على ورق طبخ
وهذا الشكل النهائي بعد ما طاب
صراحة بنات جربوه وما تندموش والله تحفة ويحمر الوجه يتقدم مع صلصة الجبن ولا صلصة حارة ويتقدم مع لي سوب ويحمر الوجه
وهذا النتشة لبسومة عضيت انا شوي وخليتلها شوي
ما تقلويش اني حبست الريجيم هااااااهو ليك طبسيى لاسوب يبان اني ذقت برك ما تعيطيش عني
في الاخير نتمنالكم ا لهناء وين ما كنتو وربي يفرحكم ويعطيكم قد قلوبكم الطيبين يا طيبات
يممممم بيسكويت يشهي
عجبتني الوصفة
والطريقة أكيد100 ب 100
يعطيك الصحة
والله بسكوي يشهي وفكرة مليحة
ربي يفرحك و يخليك لينا يااااا الطيبة
دائما نسناو جديدك , دمتي متألّقة يا ألماسة المنتدى.
مشكورة اختي هايل و خاصة للاطفال لي ميحبوش ياكلو كيما اسراء
ربي يسترك فور ان شاء الله نجربها
سلامو
حبيبتي وصفة رائعة و زيد جاوك يهبلو
سلمت يداك حبوبتي راكي خير والبراكة في المنتدانا