حنا نعرفو بلي بزاف ناس تحب القديد وتغتنم الفرصة لصنع القديدمن لحم خروف العيد
والقديد معروف منذ ازمان بين العرب ويقدم حاليا في المطاعم العالمية
جبتلكم طريقتي في صنع القديد وحنا نسموه لخليع
القديد يصنع من لحم هبرة او من الضلوع لي هما معروفين بلي كوط
انا هنا اخذت لحم هبرة وفتحتو الى شرائح رقيقة
استعملت الملح والفلفل الاسود والبابريكا الحارة ولا اي توابل تحبيها المهم الملح والفلفل الاسود لازم اللحم يتغمس مليح في هاد التوابل باه ما يفزدش تذرذري وتظغطي بيدك حتى تتداخل المكونات في اللحم
بعد ذلك حطيتو في كيس بلاستيكي وخليتو في الثلاجة والصباح نشرتو فوق لحبل وزعتو باه تلحق ليه الشمس
هاو القديد تاعنا يبس
بعد ما تشوفي القديد تاعك يابس تنحيه وتخبيه
انا قسمتو قطع صغيرة حطيت معاه فلفل احمر يابس لحتو في علبة من لبلاستيك وحطيتو في الثلاجة
انتظروني في الشتاء القارص وقصعة تع عيش بالقديد 
ملاحظة: انا نحب الملاحظات خخخخ القديد بكري كانو يخبيوه في كيس تع كتان او كيس يعملوه من جلد الماعز او جلد الخروف
ماشي يلوحو القديد في جلد وهو مش مخدوم ههههه
بعدما يخدمو الجلد وبالعقاقير ويخليوه منقي يحطو فيه القديد هاك يبقى حاكم البنة تاعو وما يفزدش
بالعربية في بلاصة الثلاجة هههههه
بصح وينهي البراكة تع بكري 
مام حنــآ تـآنيك
نديــروه هكدا
كل الشكر لكي
ديريلي ساشي منو العام الجاي مع … راكي عارفة خخخخ
|
مرسي ليك حبيبتي نورتيني
|
ندير بيه مرة ولا مرتين هههههه
ياااي صاشي برك خروف كامل نخلعو هههه يعني نديرو قديد على جالك مش خسارة
ومع من نبعثو مع ادم ههههههههه ولا مع راجل ختي كي نعطيكم الراس
نسقسيك الملح ديري جوست جوست و لا بزيادة
و كنلوحو في المرقة كفاش انا منقعدش لشتا نسنى
وحدة قالتلي بلي ميلزمش نعرضوه بزاف للشمس
شحال قعد باش يبسلك
جاوبيني الليلة باش نجبد 3 طراف من المجمد
نيبس قيس مرتين
مرة نستبن و المرة التانية نحمد ربي على النعمة هههه
و شكرا دافونس
و يعطيك الصحة .. حرة الحراير
|
الملح ديري بالزيادة لانو الملح هولي يخليه ما يفزدش والفلفل الاحمر البودرة والفلفل الاسود
لانو لما جي تطبخي بيه راك تشمخيه في الما وتغسليه يعني الملح تاعو يروح ما يبقاش
شوفي بماانو انا حطيتو في المجمد
القديد تاعي درتو ثالث عيد واليوم خبيتو يسمى 6 ايام واذا حطحطيه خارج المجمد لازم يبس مليح عند الشمس والهوا
اني جاوبتك واذا مافهمتيش حاجة نحن في الخدمة
بوركت حدة.
عيشي فرطاس مسكين
العام الجاي نفكر للقديد ان شا ءالله
تسلمي على الوصفة
حنا نديروله غير الملح برك بصح طريقتك اكيد ابن خطرش راح ييبس معطر
مرسي ليك