درت طيور السمان بالارز في الفور حبيت نحطلكم الوصفة والطريقة والصور اول مرة رح نحطلكم طيابي ما تضحكوش عليا نبداو بسم الله:
اولا:
نغسلو طيور السمان مليح ونديرولهم شويا ملح وخل ونخليوهم بجنب حتان يتشربو
نديرو في لاكوكوت
بصلة مسكرفجة+ ثوم+ ملح+كسبر+مغرفة صغيرة موطارد+شويا زعفران نسيت ما حطيتوش في الصورة
نخليوهم يتكتكو شويا في النار ومباعد نضيفولهم السمان ونخليوهم على نار هادئة
وبعد خمس دقائق نمرقو بكاس ونص نتاع ماء ونخليو المقادير تغلي ما نغلقوش لاكوكوت على خاطر طيور السمان خفاف في اطياب لوكان نغلقوها يتفتت اللحم نتاعهم
من بعد ننزعوه ونحطوه بجنب ونحضرو الحشو اللي هو حسب الاختيار لحم مرحي او كبد مرحي المهم نضيفولو كسبر اخضر وملح ونموت على الموطارد
من بعد ما يطيب الحشو
نحشيو العصافير صراحة غاضوني صغار بزاف
المهم نحشيوهم ونحطوهم
ونكونو حضرنا الروز طيبناه في الماء وشويا ملح وزيد ونص حبة نتاع قارص وورقة نتاع رند
ندهنو البلاطو بالزبدة ونحطو فيه الروز
ونصفيو المرقة اللي كنا طيبنا فيها السمان في جيهة
ونحضرو تتبيلة ندهنو بيها السمان باه يتحمر نديرو فيها زبدة زعفران شويا فلفل احمر وملح وطبعا حبيبي الموطارد
نسقيو الروز بالمرق اللي كنا طيبنا فيه السمان وصفيناه من البصل
ندهنو السمان بالتتبيلة ونحطوه فوق الروز وندخلوه للفرن
وهذا شكله النهائي
نتمنى يعجبكم وما تضحكوش عليا
بالصحة عليكم وننتظر تعليقاتكم
نتمسخر معاك يعطيك الف عافية يا عفوفة لحبيبة
وقيلة غيرت راي كنت حابة سلاطة المهراس لكن الان
كي شفت هذا عجبني متنسايش الهريسة تاع الدار
كاش نهار اعملينا الوصفة تاعها
بصحتكم الاكلة
:yahoo::yahoo:
تسلم ايدك
طلعتي شاطرة يالفحلة
بصحتكم
|
والله يجي بنين جربيه ورديلي الخبر
اما عن الهريسة راه قريب يدخل وقت الفلفل الاحمر نهار نجيبوه ونخدموه نحطلك الطريقة بالتفصيل
احنا الهريسة نديروها عولة يعني نخدموها بزاف ونبقاو ناكلوها في الشتاء وفي رمضان
مشكور لمرورك بسومة
|
زعمى برك مانيش فحلة كيما نتوما
مشكورة لمرورك
هايلين ان شالله نجربهم ونردلك بلخبر يا عفافو
|
المهم ربي يبارك فيك مشكورة على مرورك
|
ههههه بارك الله فيكي يا عفوفة
كل هذا يخرج من يديك تسلمي
ياشاطرة