هدا خبز الدار رائع يصلح للعرضات خفيف كي القطن عملتو اليوم الغداء مع بطاطا ومرقاز
صدقوني هاد الخبز خفيف جدا جدا ومايتشبعش يبان مسكوتة نتمنى تطبقوه وتردولي وانشاء الله نشوف تطبيقاتكم في القريب العاجل
المقادير
في صحن كبير ديري ثلاث بيضات مع نص كاس اينوكس زيت وملعقة كبيرة خميرة خميرة الخبز ومغرف ملح ومغرف كبيرة ونصف سكر زيدي فوقهم كاس ونصف حليب سائل دافي ونصف الكاس ماء زهر يعني زوج كيسان اينوكس بين الحليب وماء الزهر خلطي الكل مليح مليح بالباتور وزيدي 1كلغ بالضبط فرينة من دون زيادة ولا نقصان وزيدي 1خميرة نتاع القاطو ومغرف ثانية من خميرة الخبز خلطي من غير ماتعجني بملعقة خشبية رح تتحصلي على عجينة تلصق خليها في نفس الصحن وغطيه بكيس ثم بمنشفة وخلي العجينة تتخمر نصف ساعة في مكان دافيء ادهني زوج سنيوات نتاع الفرن بالزبدة وادهني يدك مليح بالزيت واقسمي العجينة على السنيوات الزوج زيدي ادهني يدك وحلي العجينة في السنيوة حتى تولي قيسها سقميها مليح راهي تاخد شوية وقت لان العجينة طرية بزاف وايلاستيك ادهني الوجه بصفار البيض ورشي الجلجلان والسينوج زيدي خليها تتخمر مرة تانية ربع ساعة وهدا امر مهم ويعمل فرق ثم انقبي القرصة بفرشيطة ودخليها تطيب ماتاخدش وقت كثير
ملاحضة استعملي الزيت في يدك لان العجينة شوية سائلة وتلصق في يدك ادا ما تستعمليش الزيت تغلبك معاها
ادا ماتحبيش الخبز الخشين نقصي شوية من العجينة قبل ما تحطيها في السنيوات تتحصلي عاى زوج قرصات كبار وقرصة صغيرة اعطيهالي ليا ههههههه
هاد الكمية تعملك زوج قرصات كي يجو ولادك ولا يجيوك الضياف يخلصوهم في زوج دقائق لانهم فعلا مثل القاطو
اي استفسار انا في الخدمة
هدا عشايا اليوم حوت بطريقة جديدة وسهلة ومقرمشة مع بطاطا صوتي في الكوكوط وسلاطة وحميص وديسار
اما عن الحوت اغسلت ال ساردين واعصرت عليها حبة قارص وسنة توم مرحية خلط الكل وفي صحن حطيت كاس سميد احرش مع مغرف كموم وملح وزوج ملاعق فرينة ومرغدت حبات السردينة فيهم حتى تغلفو مليح وقليتهم في الزيت حتى تحمرو قطرتهم وقدمتهم وطعمهم روعة يقرمشو بطريقة رهيبة
يشهي
هايل وخفيف
احنا نعملوه بالسميد و انا جامي جربتوا بالفرينة و راني كتبت المقادير و ناوية نديروا ان شاء الله
لكن عندي استفسار صغير من فضلك
في البداية حطيني ملعقة كبيرة من خميرة الخبز و ايضا كيس خميرة كميائية تاع القاطو
و امبعد زدتي ملعقة خميرة تاع الخبز ايضا بنفس الملعقة يعني ملعقة اكل و ماشي بزاف يجي طالع بزلف و الا عادي
ايضا لم تتحدثي عن العجن ماتعجنيهش خلاص يتلم برك
في انتظار ردك باش نطبقوا ان شاء الله
و بصحتكم العشاء و يعطيك الصحة
الله يبارك جاك يشهي ومن الصورة باين بلي خفيف .. نجربوا ان شاء الله في اقرب فرصة
بارك الله فيك
يعطيكـ الصحة خيتوو