اهلا باللمويات ديالنا
درك تستغربو mlina4algeria ليوم دخلت للكوزينة
انا ليوم قررت نديرلكم اكلة قبائلية و علبالي راكو جامي كليتوها
ايسموها
ثــيركيــمث
هذي نديروها غير في الشتاء نهار يكون يوم بارد و ممطر كما ليوم بيانسور 
ملاحضة هذي الاكلة ميكلوهاش الانانيش
راح تجيكم شويا غريبة لاكن صدقوني راهي ماتتشبعش
و الصور راهم مايبانوش مليح الله غالب هذا واش كاين
نبدى بالمقادير
المرقا راح يكون فيها هذو :
عندنا بصلة + 3 سنات ثوم + 3 حبات جزر + حبة بطاطا + شويا فلفل اسود +شويا ملح +ملعقتين زيت + فلفلة حارة +ملعقة طماطم مصبرة
التحضير
نقطعو لبصل صغير و الثوم تاني نزيدو الجزر على شكل دائري
نضيفو لملح و الفلفل كحل و الزيت و نديروهم و نديروهم على نار دافية من بعد نزيدو البطاطا نقطعوها صغيرة و نخليهم حتى يتحمسو مليح حتى قريب يطيبو بعد نزيدولها الطماطم كما في الصورة
بعدها نديرولها الماء حوالي ريتلا 1 لتر
و في نفس الوقت نكونو نوجدو العجينة
مقادير خاصة بالعجينة :
دقيق + ملح + زيت + ماء ( ماشي حاجة جديدة كامل تديروها )
و نديروها على هذا الشكل
الي كامل تعرفوه
و ممبعد كي تطيب المرقا
نشدو كريات العجينة و نحلوهم وحدة تلوا الاخرى
كما في الصورة
و نديروها في المرقا
وكل ما نديرو وحدة نستناو حوالي 15 ثانية و نحركوها و نزيدو اخرى فوقها و نفس الخطوات
حتى يولي في هذا الشكل
و غير نديرو الكرة الاخيرة متستنايش بزاااف لانها تكون طابت خلاص
و تحطيها في الجفنة كما في الصورة
و هنا نكون كملت الاكلة
نتمتى تكون عجبتكم
بصحتكم حبيباتي
يم يمي ييييييييييي مرسي
بارك الله فيك وان شاء الله ماتكونش اخر مشاركة في المطبخ
اممم على ثريكمت ابان بنين راهو مذكر من الاسم
تاكلو بصحة والهنا
عندنا طبق يشبـهلو ،لفتات مسقي نديروه في راس لعآم مع سرادك تاع لعرب ولا كي يعود لجو بارد ،احنا برك لعجينة نطيبوها ساع في الطاجيـن ومبـعد اللي يحب يسقيـه نخدموه هاكا كيفكم
تشبه للمقطعة بصح هذي ساهلة ماهلة
جاري التجريب في الايام الباردة يحتاج الواحد غير للقمة سخونة تدفيه
|
وشكون الي ميموتش على الاكلات التقليدية
كامل نحبو نرجعو لتقاليدينا
و حنى لي يلزم نحافضو عليها
يعطيك الصحة شرفتي كزينتي
|
معليش المهم عجباتك الاكلة هذاك هو الصح
وان شاء الله متكون المرة الاخيرة