ان شالله تكونو بخير والاحوال تمام التمام
من مدة حكيت مع الاخت فوفة 2024 وحكيتلها على الطماطم اللي نصنعها في البيت ونخبيها
وطلبت مني الوصفة
حبيت نفيدكم بيها ونفيدها نزولا عند طلبها
عموما رح نشرح ونرافق بعض الصور فقط
احنا في الوقت اللي تجي فيه الطماطم بزاف
نشرريو بالكاجو
نغسلوها
وننزعو الراس نتاعها ونقطعوها على 3 ولا 4
ونحطوها في قدرة كبيرة تطيب وننقصو عليها الطابونة خلاص يعني نخلوها خفيفة باه تطلق الماء نتاعها
نخلوها مدة ساعة ولا ساعة ونص وكل مرة نحركو باه ما تلصقش
بعد ما تكون طابة
نرحيوها الرحية الاولى في الروبو
ونفرغوها رح تجينا على هذا الشكل
تكون مرحية لكن فيها القشور نتاع الطماطم
بعد هذا نجيبو الرحاية نتاع الحديد ولا كل واحد واش عندو ونحطولها الغربال الرقيق ونزيدو نفوتوها عليه
باه يبقاو القشور لفوق وتهبط غير الطماطم صافية
لاحظو الغربال كيفاه الحجم نتاعو
بعد ذلك نتحصلو على طماطم صافية وساجية للتخزين
هنا راها واجدة
نخملوها في اكياس البلاستيك الغذائي احنا كلكيس نديرو فيه مقدار 3 مغارف ولا زوج ونص
ونحطوهم في لاقلاص وكي نكونو رح ندوزنو الشربة ننحيو صرة(قصدي كيس) نحطوه ونزيدو غير البصل والثوم وباقي المكنونات
على فكرة عننا قريب 4 سنين ما درناش المرقة بالطماطم المصبرة
نخدمو غير بهاذي برك
نتمنى انني نكون افدتكم ولو بشيئ
وحتى اذا كانت عندكم كمية قليلة طماطم تقدرو كل مرة تخدمو بالشوي وتخبيو
موفقات حبيباتي واللي عندها اي استفسار تسالني
شكرا ليك أختي
طريقة سهلة واقتصادية
تسلم الايادي
heer: يعطيك الصحة عفوفة
فحلة وعليك الكلام الله يبارك
مشكورة عالوصفة
|
يا اختي افيدينا كيفاه تخدموها بالفلفل الحلو عمري لا جربتها
ربي يخليك اختي على المورور الطيب
|
والله يا ندوش غير تنسيك في الطماطم المصبرة وكي تجي تطيبي نحي صرة لوحيها طول في لاكوكوت واتهناي ما تضالي ترحي ما تضالي تخدمي
صح اقتصادية ومفيدةhowoff:
|
ايا مليح كي راكم تديروها تاني تهنيتو من الطماطم الاخرى
ربي يبارك فيك اختي شريفة منورة اموضوع
|
الله يسلمك اختي ام دودو مشكورة للمرور الطيب يا غالي
|
والله ننصحك بيها تتهناي من نتاع السوق طووووووووول
ربي يخليك عفوفة الغالية منورة
|
الله يسلمك مشكورة اختي للمرور الطيب
|
ايه اسهل مما يكون
مشكورة اختي على المور رالطيب
راكم مثلنا احنا زادة نعمل نفس الطريقة خطوة خطوة
مي احنا نعملها في دبوزة ماء وقت مانستحق نخرج دبوزة واش نحتاج نفرغ ومن بعد نرجعوه لفريجيدان
راه هدا وقت ذخيرة طماطم
احنا كل عام رانا على هاد البرنامج
لليوم عملناها
مشكورة على الموضوع