وشراكم يا ناس اللمة ان شاء الله تكونوا لاباس
ليوم جبتلكم سكاتش كتابي بعنوان *السي بوكريشة*:yahoo::yahoo:
نتمنى يعجبكم و يفاجي عليكم شوية
ايا منطولش عليكم
5 4 3 2 1
اكشن
البراح
يا ديوان الصالحين يا ديوان الصالحين
يا ديوان الجواحين المصريين البكايين
افطنو يا ناس الدشرة باش تسمعو واش صرى
السي بوكريشة هاد الخطرة راهو حالف بليمين
قرر بعد التحقيقات باش يقطع العلاقات
و يلغي كل اتفاقات مع هادوك المصريين
حشمنا و قلنا دا رمضان شهر التوبة و لغفران
نسينا الشيء لي كان وكنا متسامحين
قابلناهم بلازهار و لابوليس و لي موطار
ملي وصلو للمطار او هوما متكرمين
و اعطيناهم المثال تاع حسن الاستقبال
و ديناهم للاوتال سانك اطوال مستفين
و عطيناهم البوراك والشربة وزيد الستاك
و لياهورت و البيفتاك و سلايط منوعين
لكن هوما كلاو الغلة و كي شبعو سبو الملة
و هبالهم عاود ولى ديما كيما موالفين
و بلخصوص لما زيت سللهم داك البيت
راحو يضربو لاربيت و ناس كامل شاهدين
و زادت ناضت الصحافة حبت تحيي ديك الافة
مزيا حنا عندنا ثقافة والحمد لله مربيين
قابلناهم غير بضرافة و بتربية وحسن الضيافة
و شافو بلي حنا شورافا و ماراناشي حقارين
و كي مبغاوش يحشمو كل واحد يشوف امو
حنايا عمرنا منظلمو و منحبوش الضالمين
ياديوان الصاحين يا ديوان الصالحين
يا ديوان النايضين ابلغو الغايبين
يوميات بوكريشة
حسن الضيافة
السي بوكريشة قبل المبارات التي جمعت فريق الدشرة بلفريق الضيف قرر استقبال الوفد المصري في بيته و حضر لهم مادبة افطار على شرف الشهداء و العلم والوطني و مقدسات اهل الدشرة و عندما دخل الى البيت و جد زوجته *كروشة* في انتضارة و هي تجهل تماما قصة الضيوف
كروشة/هدا وين يا السي بوكريشة
بوكريشة/الله غالب الالتزامات كان لازم عليا نستقبل الضيوف فلمطار و نوصلهم للاوتيل
كروشة/شكون هاد الضياف
بوكريشة/ها المصريين
كروشة/المصريين……. يا وخدي
بوكريشة/وعلاه فرعون راه جاي معاهم.ايه المصريين و كاين ضياف وخدوخرين يزدمو عليك في رمضان غيرهم
كروشة/بعد الشيء لي عملوه فيكم في بلادهم ..رحت تستقبلهم فلمطار
بوكريشة/هدا باش نعمل الديفيرونس بينا و بينهم ز ننعتلهم واش يسواو الجزايرين و زدت عرضتهم للفطور عندنا فدار
كروشة/يفطرو عندنا تانيت…اواه وقيلة بديت تهبل….المصريين في داري بعد الشي لي داروه فينا انا نقولك الصح منقدرش نقابلهم
بوكريشة/لا لا خص غير تزيدي تروحي لصداد تشوفي الماتش انت عليك طيبي لفطور و الباقي عليا
كروشة/واش رايحة نطيبلهم
بوكريشة/راه راح الحال و منضنش تقدري تعملي الطياب نتاعنا… اعمليلهم الطياب تاع ماصر ساهل
كروشة/واش نطيبلهم انا منعرفش الطياب تاع ماصر
بوكريشة/ياو ساهل….الفول و الطعمية وشوية عيش و فراخ و حاجة سائعة
كروشة/الفول عرفتو ساهل…و الشاربات ساهلة بصح الطعمية والعيش معرفتهمش واش هوما
بوكريشة/الطعمية على ما اضن هي القرنينة..ياو هاديك لي شريتها لقنينة نحي منها شوية و طيبيهالهم و العيش هي الكسرة اليابسة تاع الزيت
كروشة/يايما… و علاش رانا فلحرب
بوكريشة/ياو هادي هي الماكلة المفضلة تاعهم
كروشة/صحا.و لفراج منين رايحة نجيبهم. فدشرة معندناش لفراخ عندنا غي لجاج لكبير
بوكريشة/اوااااه… نونونو هوما ميكلوش لجاج
كروشة/علاه ياكلوا غير لفراخ الصغار لمساكن .ميغيدوهمش و لجاج علاه ميكلوهش
بوكريشة/ياو مصابوهش.علاخاطرش لغاشي عندهم بزاف ميقدروش يستناوهم حتى يكبرو ايمالا ياكلوهم صغار ..فهمتي
كروشة/ايييييه علابيها…صحا وشحال راهم وقيلة راه جاي الفريق كامل
بوكريشة/لا لا راه جاي غير احمد حسن العزري تاع الفريق.و حسن معوض هداك قصير ميكولش بزاف.و الحاج بركات هداك معرضتوش و راه جاي.و زيدي وجدي حبة بوراكة ممكن راهو جاي ابو تريكة
مزال باقيين النكت
كووووووووووووونووووووو معنا
ننتظر منك الجديد
بالتوفيق
ههههههههههههه
فور هذي
شكرا لك
وفقك الله
بوكريشة/لا لا راه جاي غير احمد حسن العزري تاع الفريق.و حسن معوض هداك قصير ميكولش بزاف.و الحاج بركات هداك معرضتوش و راه جاي.و زيدي وجدي حبة بوراكة ممكن راهو جاي ابو تريكة
يا كروشة احمدي ربي مجاكش معاهم المدرب شحتوت
يعطيك الف عافية على المجهود
تقبلي مروري
|
مرسي حنونة نوووووووووووووت
|
مرسي خويا نورت الموضوع بمرورك العطر
|
شكرا اخي على الرد نوووووووووووووورت الموضوع تحياتي
و على ربى و الوالدين و يا وداد جبتيها منين
ههههههههههههه
يعطيك الصحة دودو و الله جبتيها سوا سوا
آيا مليح لى لقيت شكون يزهينى ، نبقى غير أنا نزهى فيكم ؟ هاو انتى تانى باسم الله ما شاء الله قمة
ربى يعيشك كثريلنا منهم المواضيع هادو نموت عليهم
يعطيك الصحة دودو و تستاهلى احلى تقييم
صحا فطورك
والله غير فور اختي وداد
يعطيك الصحة