السلام عليكم ورحمة الله وبركاته
جالت في بالي خواطر من هنا وهناك
وحبيت نشارككم معايا باش نتناقشو ونوصلو لحلول اذا امكن
وموضوعي هادا ماهوش ترفيهي بل هو اقرب للدعوي
كامل نعرفو بلي الزواج نصف الدين وهو اللبنة لي يقوم عليها المجتمع السليم
والزواج عندنا عامة وراح نتحدث بالخصوص على الجزاير عندو ظروف عدة
التعارف الشوفة الخطبة العقد واخيرا العرس
راح نبدا نناقش كل مرحلة على حدى:
التعارف
التعارف نوعان:
– تقليدي لي يكون عن طريق الاهل والمعارف وين الشخصان عمرهم ماشافو بعضاهم
– ومايسمى بالحديث وين الشخصان يعرفو بعضاهم عن طريق الزمالة ولا الجيرة ولا مقربين في نفس العايلة
وهنا راح يتمحور السؤال:على اي اساس قد تقبل طفلة التعرف على راجل ما تعرفش واش نواياه الحقيقية من هادا التعارف وما تعرفش اخلاقياتو ؟ (هدا خاطر الناس غالبا يخبيو الحوايج الخاسرة كي يتسألو على شخص ما )
الشوفة
هي المرحلة التانية لي فيها يجي أهل الراجل يشوفو الطفلة لي هدرولهوم عليها وممكن يجي الراجل تاني معاهم
وكما هو معلوم أن حدود النظرة الشرعية هي انو الخاطب يشوف من الطفلة مايبدو منها عادة كيما الوجه و الكفين والرجلين وممكن الشعر
السؤال:الخاطب هو الوحيد لي لازم يشوف منك زينتك شرعا بصح كاين بزاف الخطاب لي يجيو معاهم خواتهم واقاربهم الرجال ويحشرو رواحم باش يشوفو/ كيفاش تعاملتي مع هادا الموقف؟
الخطبة
هي مرحلة التعارف الفعلي وبناء الأسس المتينة لعلاقة مباركة
وباش تكون العلاقة مباركة مالازمش تنوشها شوائب محرمة
ونذكر منها الخرجات والدخلات الكثيرة
الهدرة فالبورطابل لساعات طويلة مع الكلام لي مالوش لزوم
وكاين في الشرق عائلات تسمح لبناتها تسافر تحوس مع الخاطب لأماكن بعيدة وحدهم
السؤال:هل قدرتي طبقي الشرع في فترة خطوبتك وتتفاداي كل ماهو محرم؟
العقد
هو الزواج الشرعي الحلال وهو حضور كل الأركان من صداق وولي أمر وشهود الخ
والقانون الجديد منع أئمة المساجد والشيوخ من عقد القران دون توفر دفتر العائلة أي العقد الموثق في البلدية
السؤال : هل طبقتو هادا القانون في العقود تاعكم ولا تجاوزتوه بشيوخ من معارفكم؟
العرس
هو الوليمة لي يديروها أهل العريس والعروس على شرف الزوجان في حضور الضيوف
وهو موقع العروس باش تعرض زينتها وتصديرتها وحوايجها
وهنا نقسمو الفرح نوعان:
فالدار: هاداك يكون طبيعي أن الرجال مايتخلطوش مع النساء وكل فرقة على حدى
فلاصال:هنا الوخدة الكبيرة راح يتخلط الحابل بالنابل والمفروض العريس والعروسة يقعدو على الكرسي المخصص ليهم وين يتصورو مع حبابهم
السؤال:لبستي الخمار تاعك مع لاغوب بلانش ولا قعدتي بشعرك قدام هاداك الجمع الغفير؟
المطلوب من العضوات الكريمات يقتبسو كل سؤال ويجاوبو عليه
وكل ضيفة عندها قصة بخصوص الموضوع ماتبخلش علينا وعلى باقي العزيزات
دمتم في كنف الرحمن
لي عودة ان شاء الله للنقاش
