هادا قاطو الجوزة عملت الأسبوع لي فات و لان النت معنديش ما صورتوش الاسبوع هذا رجعنا النت صورتو جاهز فقط
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
و ان شاء الله مرة اخرى نحطو بالخطوات المصورة بالتفصيل الممل للأخوات لي ميعرفوهش
المقادير :
250 غ مرغرين
1 فاني
2 مغارف سكر
2 بيضات و واحدة صفار
1 خميرة
نصف كأس نشاء
رشة ملح
فرينة نجمعو العجينة
مول الجوزة انا هادا لي عندي و كاين انواع كثيرة فالسوق و كاين حتى المول الكهربائي لكن هذا احسن يتغسل بالماء و الصابون ما يروح ما يجي
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
للتزيين :
شوية جوز مرحي
شوية كوكاو مرحي
شكولا الدهن انا استعملت هادي
شوية مربى مشماش
شكولا بودرة
إضغط هنا لرؤية الصورة بحجمها الطبيعي.
تخلطي الزبدة مع الزيت و الملح و السكر ملييييييييييييييييييييييييييح ثم تضيفي البيض و الفاني و تخلطي مليييييييييييييييييييييييييييي يح ثم النشاء و الخميرة و تخلطي مليييييييييييييييييييييييييييي ييييييح و اخيرا تشيحي بالفرينة حتى تتحصلي على عجينة طرية تعمليها كويرات صغيرة كامل و تغطيها بكيس بلاستيكي
تحطي المول يسخن انا طيبت فوق الكويزينيار غطيتو بورق المنيوم و طيبت يسخن من الجهتين ثم فوق الرخامة تفتحي المول و تحطي الكويرات نتاعك و تغلقي مليح تزيري باه تجي الحبة رقيقة ما تجيش خشينة بزاف و تجي مجوفة فالداخل
تحمريها من الاسفل ثم تزيدي من الجهة الاخرى تقدري بعد 2 دقائق تفتحي عليه و تشوفي اذا حمارت ولا لا حتى تحمار لازم يكون اللون ذهبي ماش تحمار بزاف
لما طيب تنحيها من المول و تحطيها في قصعة و اذا ما خرجتش بسهولة انفضي المول على الحاشية فوق الرخامة تنزل الحلوى وحدها و هكذا حتى تكملي كل الكمية
تخليه يبرد مليح ثم هادوك لحواشي لي يجيو زايدين تحيهم و تعدلي الشكل نتاع الحبة تاعك
تهرسي هادوك الحواشي بشوكة و تخلطيهم مع الكوكاو و الجوز خخخخخخخخخ الاقتصاد مليح نعمة ربي
و تضيفي المعجون و شكولا الدهن و تخلطي مليح من الافضل المعجون تستعملي شوية فقط حتى ما يفسدش الذوق
و للاخوات لي تجيهم شكولا الدهن غالية ممكن تستعمل نستلي كرمال نستلي عادية و طيبها فالكوكوت و لما تبرد تخفقها و تخلط معاها الكوكاو و الحواشي و الجوز
او للاخوات لي يحبو الكابريس ممكن يذوبوها في حمام مائي مع 2 مغارف زبدة و 2 مغارف حليب و لما تذوب تخليها تبرد شوية و تخلطها الكوكاو و الجوز و الحواشي
و كل وحدة حسب ذوقها و حسب امكانياتها
المهم الحشوة لي رح نستعملها نحشي بيها النصف و نلصق كل زوج مع بعض ما لازمش الحشوة تجي خارجة على الحبة ولا قليلة لازم قدقد و نخليها تتماسك
تجيب علبة ولا باطة بغطاء تكون دائرية و نحط الشكولا غبرة و نحط شوية حبات نغلق الغطاء و ندور العلبة حتى يتمرغدو الجوزات فالغبرة و يصبح لونهم مثل حبات الجوز
نخرجهم و نحطهم في صفاية كبيرة او غربال باش نحي الزائد و تقدم في ليكيسات
نتمنى شرحي يكون مفهوم خخخخخخخخخخخخ تعودت نشرح بالصور الله غالب المرة الجاية
اذا عجبتكم الوصفة دعوة خير لبنات
بارك الله فيك اختي
قاطو الجوزة تشهر مدة من بعد نساوه الناس وهذا المدة ثاني رجع وبزاف ناس صارت تعملو في المناسبات
جاك مليح يعطيك الصحة
جاك هايل
جآآكـ مليح اختي
يعطيكـ الصحة
الله يحفظك وبارك الله فيك اختي على هاذ القاتو اللي يعجبني بزافوماكنتش نعرف الوصفة
مشكورة اختي