بما انه موسم الاجاص استغليت فرصة وجودو وعملت المعجون نتاعو وخبيتو لوقت الحاجة
حبيت نفيد الاخوات اللي ماش موالفين يخدموه
المقادير :
كيلو أنجاص
حبتين تفاح
800 غ سكر
عصير ليمونة
عود قرفة
نجمة الارض
لتر ماء
طريقة التحضير :
نقشرو حبات الاجاص ونحفروهم في الوسط ننزعو البذور ونحطوهم في ماء بارد ونخلوهم
من جهة اخرى نقسمو حبات التفاح ونحطوهم في نصف لتر ماء نخلوه يطيب فيه يوغلي حتان يبقى من الماء حوالي ربع لتر ويرجع شوي خاثر (يتخثر بالبكتين الموجود في التفاح)
نحطو ربع لتر ماء مع 800 غ سكر انا ما حطيتش 800 كام حطيت وحد 700 باه ما يجيش حلو ياسر
نحطوهم علىا لنار ونخلوهم يغليو
نضيفو عليهم عصير الليمونة
وبعد ما يطيب التفاح نصفيوه ونضيفو الماء نتاعو للشربات اللي حطيناها
ننحو حبات الاجاس منا لماء البارد ونحطوهم طول في الشربات ونحطو عليهم عود القرفة
انا ما لقيتش قرفة اعواد حطيت نص ملعقة مطحونة
وننقصو النار ونخلوها تغلي على نار خفيفة ونغطوها
وحد الساعتين نشوفو الماء نقص نطفيو عليها ونحطو نجمة الارض فيها ونخلوها تبات ليلة كاملة
في الغد نلقاوها تتعسل وخاثرة
ونقدرو نقدموها
اليكم الصور
نتمنى انه يعجبكم وتجربوه
ربي يهنيكم كاملين
واحد الطباخ دار نفس الطريقة بصح خلا الانجاصات كاملين ومع العصير تاع التفاح والقرفة
يعطيك الصحة وبصحتكم
هانا نتعلمو منا ومنهيه
انا تقريبا المعجونات كامل نديرهم بهاذ الطريقة
كاين اللي يهرسو بالفرشيطة انا حبيت نخليه شوي مدقدق باسكو استعملت الانجاص الصغير
يعطيكـ الصحة عفوفة خرجلكـ تححفة ..
لآكآن قعدت في كاش نهآر من العآم الجآي رآني نديروو
هههـتآع الصح يهبببل .. صحيتي عفوف ~
|
والله توحشتها قد الدنيا
الله يسلمك حبيبتي والله ضيقة الخاطر راني نعمر في الفيد برك بهاذو التخنتيشات
ان شالله ترجع ويرجع الزهو نتاع الدار
ما تقعديش ضرك وما تطبقيليش ضرك نهار تكوني مخملة الكابة نتاع الجامعة اخدمي باطة واديها افطري بيها كل صباح
ربي يوفقك حبيبتي
ام ندوش انا تاني شفت هداك الديسار
ربي يبارك عليك
ميرسي والله عجبني بزاااف
سلام
nada242017, dahbito+, عفاف الجزائرية+
هكا الصباح كنا نتفرجو في التلفزيون ههههههههههههه
والله يا عفاف نشتي نشوفهم كيفاه يطيبو
يسهلو كلش وطياباتهم كامل تطيب في 5 دقايق 
شفتي يعطولك النفحة في الطياب
ومع ندخل للكوزينة ونلقى حاجة ناقصة نطبق كل شي ونخرج هههههه
الله الله على الفحلة ديالنا كل صبع بصنعة